„ნაპოლის” თავკაცმა ლუჩანო სპალეტიმ „რომასთან” 2:1 გამარჯვების შემდეგ DAZN-თან ინტერვიუში აღნიშნა:
ასეთი თამაშების მოგება მხოლოდ იმ შემთხვევაში შეიძლება, თუ მთელი გუნდი, მეკარით დაწყებული ბოლო სათადარიგოთი დამთავრებული, შეხვედრის უკანასკნელ წამამდე თავდადებულია და გამარჯვებაზეა მომართული. ეს იყო ძალიან რთული თამაში, მაგრამ ყველამ ვინც შეცვლაზე შევიდა აჩვენა, რომ მოვლენებში პირველივე წუთიდან მთელი გულით იყო ჩართული და ეს ჩვენი გუნდის უმნიშვნელოვანესი თვისებაა. ასეთ დაძაბულ შეხვედრაში მონაწილეობისთვის ყველა ფეხბურთელი ყოველდღიურ მუშაობაში თავიდან ბოლომდე უნდა იყოს ჩართული. დღევანდელის მსგავსი გამარჯვება შესაძლებელია მაშინ, როდესაც ყველა მოთამაშე თანაგუნდელის ადგილის წართმევას კი არა, მასთან პარტნიორობას ცდილობს.
დი ლორენცომ მთელ მოედანზე ძალიან ბევრი ირბინა. რით აიხსნება ეს?
ეს ნაწილობრივ ფეხბურთელის ხასიათით არის განპირობებული. გარდა ამისა, როდესაც ის დრიბლინგს იწყებდა, წინ მეტოქის განაპირა მცველი ან მარცხენა ნახევარმცველი ეღობებოდნენ და ბურთის გათამაშებას ვეღარ ასწრებდა. ჩვეულებრივ შეტევებს უფრო ხარისხიანად ვაგებთ, დღეს კი მოედნის სხვადასხვა მონაკვეთებზე რიცხობრივი უპირატესობის მოპოვება გვიჭირდა. ამის გამო ვიქტორ ოსიმენსაც ვერ ვუქმნიდით ხელსაყრელ მდგომარეობებს. მას სივრცეების პოვნა უჭირდა.
თუმცა ოსიმენმა საოცარი გოლი გაიტანა
შესანიშნავი. გამოჩნდა მისი მაღალი ტექნიკა, პიროვნული თვისებები. მას მართლაც არაჩვეულებრივი დარტყმა აქვს. ოსიმენი ფიზიკურად ძლიერია. მეტოქეებს მასთან ახლოს მისვლა უჭირთ. ის ძალიან მნიშვნელოვანი ფეხბურთელია.
სათადარიგოების შესახებ…
არ შეიძლება მწვრთნელმა არ მიაქციოს ყურადღება ვარჯიშებზე ფეხბურთელების მონდომებას. მუდამ ერთსა და იმავე შემადგენლობა ვერ ათამაშებ. აუცილებელია ყველა მოთამაშის მოწადინებისა და შრომის გათვალისწინება. სეზონის დასაწყისში, როდესაც ოსიმენი ტრავმას მკურნალობდა რასპადორიმ და სიმეონემ ჩემპიონთა ლიგის ეტაპი გადაგვალახინეს. დღეს, როდესაც ხუთი ცვლილებაა ნებადართული, უკვე ყველას შეცვლა და ყველას შეყვანა შეიძლება.
რა აჩუქეთ მოურინიუს?
პულჩინელა. (ნეაპოლური ნიღბების კომედიის ერთ-ერთი პერსონაჟი. მასხარა)
