ტიტე რომ ბრაზილიის ნაკრების თავკაცის თანამდებობიდან გადადგებოდა, ეს ჯერ კიდევ მსოფლიოს ჩემპიონატამდე იყო ცნობილი, ახლა კი ოფიციალურად დადასტურდა.
„მწარედ დავმარცხდით, მაგრამ სინდისის წინაშე მართალი ვარ, — თქვა ხორვატიასთან პენალტების სერიაში წაგების შემდეგ „სელესაოს” აწ უკვე ყოფილმა მწვრთნელმა, — ვადასტურებ, რომ ეს ნაკრებში ჩემი მუშაობის დასასრულია. ამის შესახებ წელიწადნახევრის წინ მქონდა გამოცხადებული”.
შემდეგ ტიტეს გაშვებული გოლი გაახსენეს (შეხვედრის ძირითადი დრო 0:0 დასრულდა, დამატებითის პირველი ნახევრის წამატებულ დროში ნეიმარმა გახსნა ანგარიში, მაგრამ 117-ე წუთზე ბრუნო პეტკივიჩმა, რომელიც ზაგრების „დინამოს” თავდამსხმელია, ანგარიში გაქვითა) და უთხრეს, რომ მისი თავიდან აცილება შეიძლებოდა. ტიტემ იუარა:
„ტყუილია, თითქოს დაცვაში ავირიეთ. ჩვენ შეტევას ვიწყებდით, მაგრამ ბურთი მეტოქემ იხელთა, მოედნის სიღრმიდან წამოიღო და ამან სირთულეები შეგვიქმნა, რასაც დარტყმის შემდეგ რიკოშეტი დაემატა”.
ყველაზე დაჟინებით კი ბრაზილიის გადამდგარ მწვრთნელს პენალტისტების შერჩევაზე ეკითხებოდნენ. მან უპასუხა:
„ნეიმარმა რატომ არ დაარტყა? მას ბოლო პენალტი უნდა შეესრულებინა. ასეთი ფსიქოლოგიური წნეხის პირობებში გადამწყვეტი თერთმეტმეტრიანი ყველაზე მაღალი კლასის და მენტალურად ძლიერმა მოთამაშემ უნდა დაარტყას”.
ბრაზილიის ნაკრები ყატარს დღეს დატოვებს. გუნდი ლონდონში მიფრინავს, სადაც ტიტეს, მის ასისტენტებსა და ბრაზილიაში მიმავალ სამ მოთამაშეს 21 ფეხბურთელიდან დაემშვიდობება. ისინი თავიანთ ევროპულ კლუბებში დაიქსაქსებიან.
