„კორიერე დელო სპორტი” გვახსენებს, რომ ნებისმიერი კომპიუტერი ცდება, სულ მცირე იჭედება. არ აქვს მნიშვნელობა, ეს ჩვენი სახლის კომპიუტერია თუ საგანგებოდ შექმნილი სუპერკომპიუტერი სუპერპროგრამით. ამასთან, შეცდომების ალბათობა ერთიორად იზრდება, როდესაც საქმე ეხება ისეთ ამოუცნობ ფენომენს, როგორიც არის ფეხბურთი.
მაშ ასე, ყატარი 2022-ის ჯგუფური ეტაპის პროგნოზიდან 20 დღეში BonusCodeBets-ის ჭკუის კოლოფი მოწყობილობა იძულებული გახდა „პირველი ჩვენება” შეეცვალა. სხვა გზა არც ჰქონდა, რადგან მუნდიალის პირველ 56 შეხვედრაში ბევრი მოულოდნელი რამ მოხდა. ყველაზე უცნაური ამბები, რასაც ვერც ადამიანი მიხვდებოდა და ვერც ხელოვნური ინტელექტი E ჯგუფში დატრიალდა. ყველას ეგონა, რომ ესპანეთი და გერმანია იაპონიასა და კოსტა რიკას ჯგუფში იოლად ჩატოვებდნენ, მაგრამ მოხდა გაუთვალისწინებელი ამბავი: გერმანია საერთოდ ვერ გავიდა ფლეი-ოფში, ესპანეთი კი მართალია იაპონიის შემდეგ მეორე ადგილით გაძვრა, მაგრამ იქ მაროკოსთან წააგო.
ასე დადგა მეოთხედფინალი. წყვილები ცნობილია. და ადამიანებმა კვლავ მიაკითხეს კომპიუტერს, რომელიც VAR-ისა არ იყოს ყველაზე შეუმცდარი ჰქონიათ. როგორ ფიქრობთ, რას იტყოდა კომპიუტერი? რასაკვირველია თქვა, რომ ლეო მესის არგენტინა და ნეიმარის ბრაზილია ნახევარფინალში შეხვდებიან ერთმანეთს, რადგან მათ ჰოლანდია და ხორვატია წესით უნდა დაამარცხონ.
ვერც მეორე ნახევარფინალის გამოცნობისას გამოიჩინა BonusCodeBets-ის ჭკვიანმა მანქანამ თავი ორიგინალურობით. თქვა, რომ მსოფლიოს ჩემპიონი საფრანგეთი ინგლისს მოუგებს, ხოლო კრიშტიანუ რონალდუს პორტუგალია მაროკოს აუხსნის, რომ დროა წარმატებული სვლა შეწყვიტოს.
ფინალი კომპიუტერის აზრით იქნება საფრანგეთი-ბრაზილია — 1998 წლის ფინალის გამეორება — სადაც „სელესაო” გაიმარჯვებს და მეექვსედ აღმართავს მსოფლიო თასს.
მესი რონალდუს წინააღმდეგ? ეს შეხვედრა ელექტრო ჭკუის კოლოფის აზრით მესამე ადგილის ბედს გადაწყვეტს, ოღონდ… აი, აქ კომპიუტერმა ჭკუა იხმარა და არც არგენტინის მხარე დაიჭირა და არც პორტუგალიის.
