ნეიმარმა ბრაზილიისა და სერბეთის შეხვედრაში ფეხი იტკინა და ცრემლი ვერ შეიკავა. ბრაზილიელებმა სერბებს 2:0 მოუგეს.
„პარი სენ ჟერმენის” 30 წლის თავდამსხმელის წინააღმდეგ „ფიორენტინას” 25 წლის მცველმა ნიკოლა მელინკოვიჩმა იუხეშა. ნეიმარს 79-ე წუთზე მოედნის დატოვება მოუხდა. ექიმებმა ნატკენ ადგილზე დაუყოვნებლივ დაადეს ყინული. ბრაზილიის ნაკრების ექიმმა თქვა, რომ ტრავმის სიმძიმის შესაფასებლად 24-დან 48 საათამდე დასჭირდება. უფრო ოპტიმისტური იყო „სელესაოს” თავკაცი ტიტე, რომელმაც ჟურნალისტებს მდგომარეობა ასე დაუხატა:
„არ იღელვოთ. ნეიმარი მსოფლიოს ჩემპიონატზე თამაშს გააგრძელებს. შემიძლია ამაში დაგარწმუნოთ”.
ბრაზილიელებს შემდეგი შეხვედრა ორშაბათს შვეიცარიასთან აქვთ და შეძლებს თუ არა ნეიმარი მასში მონაწილეობას ჯერ არ არის ცნობილი. შვეიცარიასთან თამაშიდან ოთხ დღეში კი ბრაზილია კამერუნს ხვდება.
ნეიმარს პელეს ეროვნულ რეკორდამდე სამი გოლი აკლია. სადღეისოდ მას ნაკრების მაისურით ჩატარებულ 122 შეხვედრაში 75 გოლი აქვს გატანილი. ყოფილ ბარსელონელს რასაკვირველია ყატარის სტადიონებზე მიმდინარე ყველა შეხვედრაში სურს მონაწილეობა, მაგრამ ისიც უნდა ითქვას, რომ ტიტეს თავდასხმაში პრობლემა არ აქვს. მისი განაცხადი ცნობილი ფეხბურთელებით არის სავსე. სერბეთის ნაკრებთან სათადარიგოთა სკამზე ისხდნენ ანტონი „მანჩესტერ იუნაიტედიდან” და არსენალელები გაბრიელ ჟესუსი და გაბრიელ მარტინელი.
ჩემპიონატის წინ ნეიმარმა ბრაზილიის ნაკრების ფორმას თვითნებურად დაამატა ერთი ვარსკვლავი და ამით გამოხატა თავისი და თანაგუნდელების ამბიცია. საქმე ის არის, რომ ბრაზილია მსოფლიოს ხუთგზის ჩემპიონია ნეიმარს კი ეტყობა ეჭვი არ ეპარება, რომ ყატარში სწორედ მისი ქვეყანა გაიმარჯვებს და მეექვსე ვარსკვლავსაც მიიხატავს.
პსჟ-ს ვარსკვლავის ასეთმა „თავხედობამ” გერმანული „ბილდი” გააღიზიანა და ფეხბურთელს ამპარტავანი უწოდა, თუმცა სერბეთთან ბრაზილიელებმა რიშარლისონის ორი გოლით ისე ეფექტურად გაიმარჯვეს, რომ ბევრის აზრით ნეიმარის ამპარტავნობას შესაძლოა რეალური საფუძველიც ჰქონდეს.
ნეიმარმა „ბილდის” ნათქვამზე ასეთი კომენტარი გააკეთა: „ამპარტავნები თავად არიან. ჩვენ კი მეოცნებეები ვართ. ჩვენ მეექვსე ვარსკვლავზე ვოცნებობთ და მოსწონთ ეს მათ თუ არა, მკერდზე აუცილებლად მივიმატებთ”.
