მატჩის ნამდვილი ვარსკვლავი იყო ჰეთ-თრიქის ავტორი ვიქტორ ოსიმენი, მაგრამ ამ ჰეთ-თრიკს ნიგერიელი თავდამსხმელი ხვიჩა კვარაცხელიას უნდა უმადლოდეს. ქართველმა გარემარბმა მას ორი საგოლე პასი მიაწოდა, რის გარდა ერთი თავადაც შეაგდო. ეს გახლდათ სერიოზული ფეხბურთი მისი შესრულებით, რამაც მას კრიტიკოსების გაჩუმების შესაძლებლობა მისცა. ისინი კვარაცხელიას ხშირად საყვედურობდნენ, რომ თანაგუნდელებს პასს არ აწვდის და მარტო ცდილობს გზის გაკვლევას.
„სასუოლოსთან” თამაშში შესრულებული ორი საგოლე გადაცემა ყველაფერს პასუხს სცემს. ოსიმენისთვის მიწოდებული პასების წყალობით, ქართველი გარემარბი სერია A-ს ასისტენტთა შორის პირველია, მან თანაგუნდელებს უკვე 7 გოლი გაატანინა. კვარაცხელიამ 6-პასიან დეულოფეუსაც გადაუსწრო, მაგრამ ეს კიდევ ყველაფერი არ არის.
საგოლე გადაცემების მხრივ კვარაცხელიამ ჩემპიონთა ლიგაშიც დიდი როლი ითამაშა. ამ შეჯიბრებაში მან სამჯერ გასწია ასისტენტობა, ერთხელ „ლივერპულთან” და ორჯერ „აიაქსთან” — ჰოლანდიასა და ნეაპოლში. ამრიგად, ქართველმა გარემარბმა მიმდინარე სეზონის 16 შეხვედრაში, რომლებშიც მონაწილეობა მიიღო, 10 საგოლე გადაცემა შეასრულა. ამას რასაკვირველია ემატება 8 გოლი, რომელიც მან ყველა შეჯიბრებაში ერთად გაიტანა.
რიცხვები, რომლებიც ზემოთ მოვიყვანეთ ძალიან შთამბეჭდავია. თან ეს ხდება პირველ სეზონში, რომელსაც კვარაცხელია „აძურის” შემადგენლობაში ატარებს. გულშემატკივარი მას ეთაყვანება, კრიტიკოსებმა კი, ჩვენი მათდამი დიდი პატივისცემის მიუხედავად, მოსადავებლად ახალი მიზეზი უნდა მოძებნონ, ოღონდ ამის გაკეთება იოლი არ იქნება. სეზონის პირველ მონაკვეთში კვარაცხელიამ, ისევე როგორც მთელმა „ნაპოლიმ” დაამტკიცა, რომ შეუჩერებელია. თან ხვიჩა მხოლოდ 21 წლისაა, რაც იმას ნიშნავს, რომ კიდევ განვითარდება. კვარაცხელია 2001 წელს არის დაბადებული და სურს „აძურის” გულშემატკივარს ოცნება აუხდინოს, მეტად და მეტად აღაფრთოვანოს ისინი. თავიანთ ახალ კერპს თავი შეაყვაროს.
დანილო სერვადეი, napolicalcio
