გიორგიმ პირველ ტაიმში მასთან პირისპირ შესულ ანსუ ფატის არ გაატანინა, კარიდან გამოვიდა და ბურთს გზა გადაუღობა. ფატის დარტყმული მას სახეში მოხვდა. სულ დასაწყისში კი იყო ერთი მომენტი, როდესაც პასი თანაგუნდელის ნაცვლად მეტოქეს მისცა, მაგრამ ამით არაფერი გაფუჭებულა, უბრალოდ ეს ეპიზოდი, ისევე როგორც ბევრი სხვა (მათ შორის გაწევ-გამოწევები), იმის დასტური იყო, რომ შეხვედრა იმთავითვე ნერვიულად მიმდინარეობდა. წამყვანი ესპანური გაზეთებიდან „მარკამ” მამარდაშვილს ერთი ვარსკვლავი დაუწერა, AS-მა კი ორი.
მატჩის შემდგომ პრეს-კონფერენციაზე „ღამურების” თავკაც ჯენარო გატუზოს ჰკითხეს:
ჩავიმ თქვა, რომ „ბარსა” გაცილებით ჯობდა „ვალენსიას”. თქვენც ასე ფიქრობთ? და კიდევ, გულშემატკივარი მიიჩნევს, რომ ბარსელონელი მარკოს ალონსო უკანასკნელი იმედის ჯარიმის გამო მსაჯს მოედნიდან უნდა გაეძევებინა. რას იტყვით ამ ეპიზოდზე?
„ჩავის დიდ პატივს ვცემ, მე მას დიდ მწვრთნელად ვთვლი, მაგრამ ვფიქრობ, რომ ამ შეხვედრაში იყო მომენტები, როდესაც ჩვენ რისკზე წავედით. მეორე ტაიმში „ბარსელონას” მომენტებს ვერც კი ვიხსენებ. ეტყობა, მე სხვა თამაშს ვუყურებდი. ერთი სიტყვით, მიმაჩნია, რომ ეს იყო ნორმალური თამაში და თუ ჩავი ამბობს, რომ მისი გუნდი გვჯობდა, მე ვერ დავეთანხმები. რაც შეეხება მარკოს ალონსოს ეპიზოდს, თუ მსაჯმა ჩათვალა, რომ მისთვის წითელი ბარათი არ უნდა ამოეღო, მაშინ არ უნდა ამოეღო”, — უპასუხა იტალიელმა.
იყო კიდევ ერთი მომენტი, როდესაც ვალენსიელმა მარკოს ანდრემ ყოველგვარი საჭიროების გარეშე ბურთს ხელი შეახო და ამის გამო „ბარსელონას” კარში სამუელ ლინოს მიერ გატანილი გოლი არ ჩაითვალა.
„შეცდომის გამო მე ფეხბურთელებს არ ვუბრაზდები. მე მიყვარს, როდესაც ისინი ბოლომდე იხარჯებიან. ამ ეპიზოდში და დამრჩა შთაბეჭდილება, რომ როდესაც ანდრე სივრცეში შერბოდა, მას ხელი შეუშალეს. მსაჯმა ასე არ მიიჩნია”, — თქვა გატუზომ.
