გასულ უქმეებზე ევროპული საკლუბო რაგბის ტოპ-ლიგებში 31-მა ქართველმა ითამაშა, თუმცა მათი ჯამური ინდივიდუალური მონაგარი ოდენ ლუკა ჭელიძის ლელოს მოიცავს. გარდა ამისა, ბორჯღალოსანმა 9 ნომერმა ვასილ ლობჟანიძემ თავისი ფრანგული „ბრივის“ კვართი მეასედ მოირგო, რაც მისი ასაკის (ვასკა სვეტიცხოვლობა-დღეს 26 წლის გახდა) კვალობაზე მეტად სოლიდური მიღწევაა. თუმცა, ლობჟანიძის საიუბილეო შეხვედრაში მისი გუნდი შინ ლიდერ „ტულუზთან“ სასტიკად დამარცხდა – 7:45…
ტოპ 14-ში სხვა საინტერესო რამ ქართველთა მხრიდან არ დაფიქსირებულა. აი, პრო დ2-ში კი იცოცხლე, ისეთი ამბები დატრიალებულა.
რაც შეეხება ლუკა ჭელიძეს, საქართველოს U20-ის ყოფილმა ბურჯმა „ბიარიცის“ შემადგენლობაში თავისი პირველი ლელო გაიტანა – ჩათვლის მოედნის ხაზზე შექმნილი რაქიდან ბურთი მიიღო, მეტოქეებს ჯიქურ ეკვეთა და დაცვა გაარღვია. თუმცა ლუკას ლელომ ბასკებს მაინც ვერ უშველა – „ბიარიცმა“ შინ „აჟენთან“ მოულოდნელი მარცხი განიცადა – 15:18.
კიდავ აღსანიშნავია „ორიაკის“ უკანახაზელის გიორგი გოგოლაძის საუცხოო თამაში. 25 წლის გარემარბ-შუამარბ-ფულბექმა „მონტობანის“ წინააღმდეგ შეუცვლელად იბურთავა და თავისი გუნდის კარგ თამაშში სოლიდური წვლილი შეიტანა, რაც საბოლოოდ „ორიაკის“ ბონუსიან გამარჯვებაში გადაიზარდა – 28:6
სხვა შემთხვევებში ქართველთა გვარები ლიგის მე-7 ტურში მხოლოდ ნეგატიურ კონტექსტში მოიხსენიებოდა.
ჯერ იყო „ბეზიეს“ ბურჯის გიორგი ახალაძის წითელი ბარათით უკვე 25-ე წუთზე გაძევება, თუმცა მისმა გუნდმა „მასისთან“ გასვლაზე მაინც მოიგო – 16:10.
შემდეგ, ასევე წითელი ბარათი ბორჯღალოსანმა გიორგი ჯავახიამ მიიღო, რომელიც „ორიაკის“ მიერ მოგებულ მატჩში მეორე ტაიმის პირველივე წუთიდან ჩაერთო, მაგრამ 59-ეზე მონტობანელ ბურჯს მუშტი-კრივი გაუმართა, რის გამოც რეფერიმ ორივე თამაშის ბოლომდე გააძევა.
გასაკვირია, მაგრამ იმ დღეს წითელი ბარათი კიდევ ერთმა ქართველმა იხილა. 22 წლის საბა ფესვიანიძემ შესანიშნავად ითამაშა თავის „ანგულემში“ და გუნდს „კარკასონის“ ძლევაშიც (18:6) მაგრად დაეხმარა, თუმცა ბოლო წამებზე ნერვები ვერ მოთოკა და რეფერის წითელი ბარათი გამოსტყუა.
ასე რომ, გარანტირებული ერთმატჩიანი დისკვალიფიკაციის შემდეგ გიორგი ახალაძის, გიორგი ჯავახიასა და საბა ფესვიანიძის ბედს სადისციპლინო კომისია საგანგებო შეკრებაზე გადაწყვეტს.
დაბოლოს, სასიხარულო ამბავი ინგლისიდან: გიორგი კვესელაძემ ზედიზედ მეორე მატჩი დაიწყო „გლოსტერის“ სასტარტოში და მისმა გუნდმა მეტად სოლიდურ „ბრისტოლსაც“ მოუგო – 31:28.
