მწვრთნელები ამბობენ, როდესაც ვერ იგებ ესე იგი მარცხდებიო. „ვალენსიასა” და „ელჩეს” ფრემ ორივე გუნდი უკმაყოფილო დატოვა, განსაკუთრებით „ელჩე”, რომელსაც ქულები მეტად სჭირდებოდა და მეორე ტაიმში უკეთეს იღბალს იმსახურებდა. მსაჯმა სერიოზული შეცდომა დაუშვა, როდესაც არ ჩათვალა გოლი, რომლის წყალობითაც სტუმრები წინ გავიდოდნენ — 3:2. მან დანიშნა ჯარიმა, რითაც დამნაშავის სასარგებლოდ იმოქმედა.
კავანიმ ლა ლიგაში თავისი პირველი გოლები გაიტანა (პენალტითა და თავურით), მაგრამ პერე მილამ მეორე ტაიმში ასევე თავური გოლით გვირგვინი დაადგა მისთვის დიდებულ თამაშს, რომლის დასაწყისშიც თავისი გუნდი პენალტით დააწინაურა.
გატუზომ თამაშის წინ თქვა, რომ „ელჩესთან” თამაში აშინებდა. ჩვეულებრივ, როდესაც გუნდმა აუცილებლად უნდა მოიგოს, მასთან კი სტუმრად ჩადის მცირექულიანი მოწინააღმდეგე, მწვრთნელები იშველიებენ დიპლომატიურ სიტყვებს „სიფრთხილე”, „მეტოქის პატივისცემა” და ასე შემდეგ. მოგვიანებით გაირკვა, რომ გატუზო მართალი იყო. პირველ ტაიმში მის გუნდს ჰქონდა დაწინაურების აშკარა შანსები, მაგრამ მოხდა სხვა რამ: 29-ე წუთზე მამარდაშვილი გამოსვლაზე შეცდა და ამის გამო დაინიშნა პენალტი, რომელიც პერე მილამ გაიტანა.
მაგრამ გუნდში კავანის ყოლა მარტო გოლებით არ იზომება, თუმც, რასაკვირველია ის უპირველეს ყოვლისა გოლების გასატანად იყიდეს. წინა ტურში, პამპლონაში, მან თითქმის სრულყოფილად ითამაშა, მაგრამ პენალტი ააცილა და მთელი კვირის განმავლობაში უსამართლოდ აკრიტიკებდნენ. ურუგვაელი მატადორი კი მეტოქეებს ერთხელ აპატიებს, განა ორჯერ. შეხვედრაში, რომელიც პერე მილას პენალტის შემდეგ მასპინძელთათვის არასასურველი მიმართულებით წავიდა, მსაჯმა გაიას წაქცევისთვის „ვალენსიას” სასარგებლოდ პენალტი დანიშნა. კავანიმ მან ბურთი მოითხოვა და: გოლ!
„ვალენსიამ” იცოდა, რომ შესვენებამდე დაწინაურებაც შეეძლო და მეორე გოლის გასატანად შეუტია. ასეც მოხდა, კავანიმ ალმეიდას პასით ბრწყინვალე თავური შეაგდო, თუმცა კოჭი გადაუბრუნდა და იძულებული გახდა შესვენების შემდეგ გასახდელში დარჩენილიყო.
ალმირონმა კი დრო იხელთა და თავის მოთამაშეებს ჭკუა დაარიგა. მწვრთნელმა, რომელიც ორი წლის წინაც ედგა „ელჩეს” სათავეში, ახლა კი ყველას გასაოცრად დაუბრუნდა გუნდს, აშკარად კატალიზატორის როლი ითამაშა. მან სასტარტო შემადგენლობაში გამოიყვანა ის ფეხბურთელები, რომლებსაც ორი წლის წინ იცნობდა, მაგრამ შემდეგ გამჭრიახი შეცვლები განახორციელა. ალმირონმა მილა ცენტრალური თავდამსხმელის ფუნქციისგან გაათავისუფლა და წინ ეზე პონსე დააყენა. ამან გამოიწვია ის, რომ მილა მოედნის ყველა მონაკვეთზე მოძრაობდა და შედეგად — 2:2.
ბოლო წუთები კი გარდამავალი უპირატესობით ჩატარდა. „ვალენსიას” ჰქონდა შანსები, „ელჩეს” კი გოლი არ ჩაუთვალეს. საბოლოოდ ფრემ ორივე გუნდი უკმაყოფილო დატოვა.
ფერნანდო ალვარესი, მარკა
