დღეს ხვიჩა კვარაცხელიას „ნაპოლი” ამსტერდამში „აიაქსს” ხვდება. ეს ჩემპიონთა ლიგის A ჯგუფის მესამე ტურის მატჩია. ორი ტურის შემდეგ ჯგუფს 6 ქულით „ნაპოლი” ლიდერობს, შემდეგ მოდიან 3 ქულიანები „ლივერპული” და „აიაქსი”, ბოლო ადგილზე კი „რეინჯერსია”, რომელმაც ორივე თამაში წააგო. მატჩის წინა პრეს-კონფერენციაზე ამსტერდამელთა მწვრთნელმა ალფრედ შრიოდერმა თქვა:
„ჩვენ შაბათის თამაშის გამო გაგვაკრიტიკეს (შინ 1:1 „გოუ ეჰედ იგლზთან”). უნდა მოგვეგო, ჩვენი ფეხბურთი ვერ ვაჩვენეთ, მაგრამ ბიჭებს საყვედურს ვერ ვეტყვი. მთავარია, რომ ვიცით, ჯერ კიდევ ბევრი მუშაობა გვჭირდება.
„ნაპოლისთან” შეხვედრის წინ საკუთარ შესაძლებლობებში დარწმუნებულები ვართ. ასეთ ძლიერ მეტოქესთან სწორი მოტივაცია გვჭირდება. ნეაპოლელებს სერია A-ს ერთ-ერთი უძლიერესი გუნდი ჰყავთ. ამაში დარწმუნება იოლია, ჩახედეთ ცხრილს, ისინი კვლავ დაუმარცხებლები არიან”.
ტრავმა
„ჩვენ მხოლოდ 19 წლის თურქი ცენტრალური მცველი აჰმეტჩან კაპლანი და მექსიკელი მარჯვენა მცველი ხორხე სანჩესი გვაკლია”.
კვარა
„ის კარგად თამაშობს. ჩვენ ეს ფეხბურთელი აუცილებლად უნდა გავაჩეროთ და თუ გუნდურად ვითამაშებთ, ამას აუცილებლად შევძლებთ. კვარაცხელია და პიოტრ ჟელინსკი ძალიან ძლიერ წყვილია”.
როგორ მოემზადა „აიაქსი”
„ვარჯიშისთვის დრო არ გვქონდა. ძირითადად თერთმეტი თერთმეტზე ვთამაშობდით. ვიდეოანალიზი ჩავატარეთ. მართალია „ლივერპული” უფრო დიდი გუნდია, მაგრამ „ნაპოლი” თითქმის იმდენადვე ძლიერია. ეს ორი გუნდი ჩვენსავით ბევრს უტევს”.
„ნაპოლის” შესახებ
„ნეაპოლელების ბევრი თამაში ვნახეთ. მათ ძლიერი, საკუთარ თავში დარწმუნებული გუნდი ჰყავთ. ბურთის ფლობისთვის მნიშვნელოვანი ფიგურაა მარიო რუი. ჩვენ შევეცდებით სწორედ ეს კომპონენტი, ბურთის ფლობა გავაუმჯობესოთ. ჩვენ და „ნაპოლი” ზედიზედ ორჯერ ვხვდებით ერთმანეთს და ამ შეხვედრებში ჩვენ მეტი გოლი უნდა გავიტანოთ. დიდი შანსია, რომ „აიაქსმა” და „ნაპოლიმ” თანაბარი ქულები დააგროვოს და ბურთების უპირატესობა დაგვჭირდება”.
ლობოტკას და ჟელინსკის შესახებ
„მათ ორი ფეხბურთელი ჰყავთ, ჟელინსკი და სტანისლავ ლობოტკა, რომლებიც მართლა დიდ საქმეს აკეთებენ”.
ლუკა ოკამპოსის შესახებ
„გვიხარია ლუკა ჩვენი ფეხბურთელი რომ არის, მაგრამ აიაქსელთაგან თავდასხმაში თამაში სხვებსაც შეუძლიათ”.
„ნაპოლი” და იტალიური ფეხბურთი
„თქვენ მეკითხებით, რამდენად იტალიური გუნდია „ნაპოლი”. გიპასუხებთ, რომ დღეს სერია A-ში ბევრი შემტევი გუნდია. იტალია ის აღარ არის, ადრე რომ იყო”.
