გასულ უქმეებზე, საფრანგეთის ტოპ 14-ის მე-5 ტურში საქართველოს ბორჯღალოსნებმა სამი შთამბეჭდავი ლელო გაიტანეს.
ლექსო ყაულაშვილის „ბორდო“ ნორჩი სერგო აბრამიშვილისა და გიორგი მელიქიძის „სტად ფრანსეს“ 15:3 ამარცხებდა, მაგრამ პარიზელებმა ბოლო წუთებზე ნამდვილი შტურმი მოაწყეს. გადამწყვეტი, მრავალფაზიანი შეტევისას კი საქართველოს ნაკრების მარჯვენა ბურჯმა მელიქიძემ ბურთი მორიგი რაქიდან აიტაცა და ღონიერი მოძრაობით ძელის შალითასთან დაამიწა. გარდასახვიანად ამ ლელომ პარიზელებს ბონუს-ქულა მოუტანა – 15:10. გიორგი თამაშში მე-60 წუთზე ჩაერთო, 6 წუთის შემდეგ კი მოედანზე უკვე ხსენებულები ყაულაშვილი და აბრამიშვილი გავიდნენ.
„პომ“ „ტულონს“ უმასპინძლა და 17:34 დამარცხდა. მასპინძელთა სასტარტო შემადგენლობაში ორი ბორჯღალოსანი იყო – გურამ პაპიძე და ბექა გორგაძე. პირველმა 51 წუთი ითამაშა, მეორემ – 50, ხოლო ტულონელებში ბექა გიგაშვილი იყო, რომელმაც პაპიძის დარად 51 წუთი გაატარა მწვანე მინდორზე და მე-18 წუთზე სეზონში თავისი მეორე ლელო გაიტანა. ტულონელთა მძლავრი მოლი ბასკთა ხუთმეტრიან ზონას მიუახლოვდა, სადაც ტულონელთა ჯგუფს ბურთიანი გიგაშვილი მოწყდა. ბექას კისერსა და მხრებზე სამი პოელი ეკიდა, მაგრამ ბორჯღალოსანმა ბურჯმა მაინც მოახერხა ლელოში შეღწევა და ბურთის დამიწება.
მესამე ქართული ლელო კი ვასილ ლობჟანიძის ანგარიშზეა. ბორჯღალოსანმა 9 ნომერმა „ბრივისა“ და „ბაიონის“ შეხვედრის პირველი ნახხევარი ძალიან ეფექტურად დახურა – დაცვაში ამოკეტილი ბასკების აბრაგანს დაუფარა, ბურთს თავადვე დაეუფლა, საკმაო მანძილი გაირბინა და როცა მას ერთ-ერთი მეტოქე თითქოს უნდა დაწეოდა, ლელოში ლამაზი ნახტომით შეფრინდა და თან მბოჭავიც შეათრია. ეს იყო ვასკას პირველი ლელო მიმდინარე სეზონში. ლობჟანიძე 62-ე წუთზე შეცვალეს, მისი თანაგუნდელი ვანო კარკაძე – შესვენებისას, თუმცა ახალგაზრდა კვაჭი 78-ეზე თამაშში დააბრუნეს, სტუმართა შორის კი კოტე მიქაუტაძე იყო, რომელმაც საწყისი 48 წუთი გაატარა მინდორზე. საბოლოოდ „ბრივმა“ 25:22 მოიგო და „ბაიონს“ ბონუსი გაატანა.
დანარჩენებზე – მოკლედ. „კლერმონმა“ „ლიონი“ 43:20 გაანადგურა და ბონუსიც მიიღო. „ვულკანებში“ ბოლო 9 წუთი გიორგი ძმანაშვილმა ითამაშა, ხოლო ლიონელებს შორის შეცვლაზე 51-ე წუთიდან ბექა საღინაძემ ირაგბა, წინა ტურის საუკეთესო მოთამაშე დავით ნინიაშვილი კი „ლიონის“ განაცხადშიც არ ყოფილა.
„პერპინიანმა“ კასტრს“ 14:10 სძლია და სანუგეშო ბონუსიც გაატანა. კატალონიელთა რიგებში 48-ე წუთზე გიორგი თეთრაშვილი გამოჩნდა.
„ლა როშელმაც“ ააღებინა ბონუსი თავის მეტოქეს – „რასინგ-92“-ს 24:19 მოუგო. პარიზელებში მარქაფიდან 51-ე წუთზე გურამ გოგიჩაშვილი და გია ხარაიშვილი გამოჩნდნენ, ეს უკანასკნელი 10 წუთში ტვინის შერყევის პროტოკოლით მინდვრიდან გაიყვანეს, თუმცა 70-ეზე თამაშის ნება დართეს.
დაბოლოს, „მონპელიე“ შინ „ტულუზთან“ მხოლოდ სანუგეშო ბონუსს გამორჩა – 17:19. გელა აფრასიძემ თამაშში ბოლო 19 წუთი დაჰყო.
