ორშაბათს, 19 სექტემბერს, „სარბიელი“2021-22 წლების სეზონის საუკეთესო ფეხბურთელს დააჯილდოებს.
გამოკითხვაში, რომელიც მაისში ჩატარდა, მონაწილეობა სამოცდათხუთმეტმა სპორტულმა ჟურნალისტმა მიიღო. ყველამ ჩამოწერა სამი საუკეთესოს მისეული ვერსია. ტრადიციისამებრ, პირველი ადგილისთვის დაირიცხა 3 ქულა, მეორე ადგილისთვის —2 და მესამე ადგილისთვის — 1. გამარჯვებული ხმების უბრალო დათვლით გამოვლინდა.
შეგახსენებთ, რომ „სარბიელის“ გამოკითხვა 1992-93 წლების სეზონიდან იღებს სათავეს და მას არასდროს გამოუვლენია ასტრონომიული წლის (იანვრიდან იანვრამდე) საუკეთესო მოთამაშე. ჯილდო ყოველთვის დასრულებული სეზონის საუკეთესოს გადაეცემა.
პირველი გამარჯვებული გახლდათ გიორგი ქინქლაძე.
ყველაზე მეტჯერ, ოთხჯერ, ლაურეატი გახდა ჩემპიონთა ლიგის ორგზის გამარჯვებული, საქართველოს ნაკრებისა და „მილანის“ მცველი კახა კალაძე.
სამჯერ ქართველმა სპორტულმა ჟურნალისტებმა საუკეთესოდ შოთა არველაძე დაასახელეს.
1994-95 წლებში ჯილდო მეკარემ, აკაკი დევაძემ მოიპოვა.
2008-09 წლების სეზონიდან მოყოლებული 2017-18 წლების სეზონამდე „სარბიელის“ გამოკითხვა არ ჩატარებულა. 2020 წელს საუკეთესოს გამოვლენას ხელი კოვიდმა შეუშალა.
ცნობილია, იმ სამი ფეხბურთელის ვინაობა, რომელთაც ამჯერად ყველაზე მეტი ქულა დააგროვეს. ესენი არიან საბა ლობჟანიძე, გიორგი მამარდაშვილი და ხვიჩა კვარაცხელია.
შეგახსენებთ, რომ გასული სეზონი პირველმა თურქულ „ჰათაისფორში” გაატარა (მე-12 ადგილი), მეორემ ესპანეთის „ვალენსიაში” (მე-9 ადგილი, თასის ფინალი), ხოლო მესამემ რუსეთის „რუბინსა” (პრემიერლიგიდან გავარდა) და ბათუმის „დინამოში” (ჩემპიონი). ჟურნალისტების აზრით 2021 წლის აგვისტოდან 2022-ის ივნისამდე სწორედ ისინი ჯობდნენ კოლეგებს.
მსურველებს გთხოვთ კომენტარებში გამოთქვათ თქვენი ვარაუდი, ზემოთ ნახსენები სამეულიდან ვინ გახდებოდა ჯილდოს მფლობელი.
