საჩოგბურთო სამყაროს ბოლო პერიოდში მეორე გმირი გამოაკლდა – სერენა უილიამსის შემდეგ კარიერის დასრულების შესახებ როჯერ ფედერერმა გამოაცხადა.
„მხიარულმა როჯერმა“ კარიერაში 20 მეიჯორი მოიგო: 6-ჯერ ავსტრალიის ღია პირველობა, 5-ჯერ აშშ-ს ღია პირველიბა, 8-ჯერ უიმბლდონი (რეკორდი) და ერთხელ „როლან გაროსი“.
მონაწილეობა მიიღო „დიდი სლემის“ 30 ფინალში, რაც ასევე რეკორდია. მათ შორის ზედიზედ 10 ფინალში – 2005 წლის „უიმბლდონიდან“ 2007 წლის აშშ-ის ღია პირველობის ჩათვლით.
შვეიცარიელს 28 მასტერსი და რეკორდული, 6 წლის შემაჯამებელი ტურნირის ტიტული აქვს.
ჯამში, როჯერმა ერთეულთა თანრიგში ATP-ის 101 ტურნირი მოიგო. ATP-ის ჩოგბურთელთა რეიტინგში ყველაზე დიდხანს – 310 კვირის განმავლობაში იკავებდა პირველ ადგილს, მათ შორის ზედიზედ 237 კვირის განმავლობაში, რაც ასევე რეკორდია.
41 წლის შვეიცარიელი Laver Cup-ზე ითამაშებს, რომელიც მის კარიერაში ATP-ის ბოლო ტურნირი იქნება.
„საჩოგბურთო ოჯახმა რაც მომცა, ყველაზე მაგარი ამდენ ადამიანთან შეხვედრა იყო. ჩემი მეგობრები, მეტოქეები, გულშემატკივრები, რომლებიც აცოცხლებენ სპორტს.
მსურს, რამდენიმე სიახლე გაგიზიაროთ. ბოლო სამი წლის განვალობაში ბევრი ტრავმა და ოპერაცია გადავიტანე. ბევრი ვიმუშავე, რომ ფორმაში სრულად დავბრუნებულიყავი, მაგრამ უკვე ვიცი, რომ ჩემი სხეულის შესაძლებლობები შეზღუდულია.
41 წლის ვარ, 24 წლის განმავლობაში 1 500 მატჩზე მეტი ჩავატარე, თუმცა, დადგა მომენტი, რომ დავასრულო ჩემი პროფესიული კარიერა. მომავალ კვირას, ლონდონში Laver Cup ჩემი ბოლო ATP ტურნირი იქნება.
მწარე გადაწყვეტილებაა, რადგან ვიცი, რომ ყველაფერი მომენატრება, რაც ჩოგბურთმა ამ წლების განმავლობაში მომცა. თავს მსოფლიოში ერთერთ ყველაზე იღბლიან ადამიანად მივიჩნევ. ჩოგბურთის თამაშის განსაკუთრებული ნიჭი მერგო და გამოვიყენე იმ დონემდე, რასაც ვერასდროს წარმოვიდგენდი. დიდი მადლობა ყველას“, – დაწერა ფედერერმა სოციალურ ქსელში.
ჩვენც მოგვენატრები, მაესტრო!
