„აღტაცებული ვარ, რომ „ნაპოლის” ჩემპიონთა ლიგაში უნდა ვუხელმძღვანელო. ეს საფეხბურთო ლუნა პარკს ჰგავს. მოედანზე გამოვლენ ფეხბურთელები, რომლებიც ცეცხლს ანთებენ და მაყურებელს აღაფრთოვანებენ. „ნაპოლის” ჩემპიონთა ლიგაში მონაწილეობა 2021-22 წლების სეზონში ჩვენი კარგი გამოსვლის შედეგია. ფეხბურთლები ამ შეჯიბრებაში მონაწილეობაზე მთელი ცხოვრება ოცნებობენ. სტანდარტი ძალიან მაღალია. გამარჯვება და დამარცხება შეიძლება ერთმა დეტალმა განაპირობოს. „ლივერპულის” დონის გუნდებთან სათამაშოდ საგანგებო მომზადებაა საჭირო. როდესაც ასეთ დიდ გუნდებს ხვდები, უნდა იცოდე, რომ მას რაღაც განსაკუთრებული შეუძლია შემოგთავაზოს.
ჩვენ ტოპ-ფეხბურთელები გვყავს. დარწმუნებული ვარ, რომ ბიჭები ხვალ თავდადებით ითამაშებენ. ისინი იმ ადგილიდან განაგრძობენ, სადაც „ლაციოსთან” გაჩერდნენ. ადრეც მითქვამს და ახლაც ვიმეორებ, ამ მოთამაშეებს მიმდინარე სეზონში გულშემატკივრის გულის მოგება კიდევ უფრო მეტად შეუძლიათ” — თქვა „ლივერპულთან” შეხვედრის წინ მოწყობილ პრეს-კონფერენციაზე „ნაპოლის” თავკაცმა ლუჩანო სპალეტიმ.
„როგორ გრძნობს თავს ვიქტორ ოსიმენი?”
„ის დღეს ინდივიდუალური გრაფიკით მუშაობდა. საქმე კარგად მიდის. თუ ხვალ გუნდთან ერთად ივარჯიშებს, მაშინ მოედანზეც ვიხილავთ”.
„ფრეზე თანახმა იქნებით”?
„ასეთი მიდგომა ჩემთვის უცხოა და ჩვენს თამაშის სტილსაც არ შეეფერება. მოედანზე ყოველთვის მოსაგებად გავდივართ. ასე იყო გასულ შაბათსაც, „ოლიმპიკოზე”, ძლიერი მეტოქის წინააღმდეგ. ქულების თვლას აზრი არ აქვს. მოედანზე გავალთ და ჩვენებურ ფეხბურთს ვითამაშებთ. შევეცდებით გავიმარჯვოთ, თან ვნახავთ, რის მაქნისები ვართ”.
„რანაირ მატჩს ელით? როგორ ითამაშებს „ლივერპული?”
„ლივერპული დინამიური გუნდია. უტევს როგორც მარჯვნიდან, ასევე მარცხნიდან. ისინი ცდილობენ შენს ზურგსუკან უკან შეაღწიონ და წნეხი მოგიწყონ. აშკარაა, რომ „ლივერპული” იტალიურ ფეხბურთს არ თამაშობს.
თან, ტაქტიკური მხარე ერთია, მაგრამ „ლივერპულს” საუცხოო ინდივიდუალისტებიც ჰყავს. ისინი პირისპირ არიან ძალიან ძლიერები. მათთან გასამკლავებლად ბევრი ენერგიის ხარჯვა და ჭკუის მოხმობა დაგვჭირდება.
უნდა ვაღიაროთ, რომ იქნება ასპექტები, რომლებშიც ისინი გვაჯობებენ. ისიც კარგად ეცოდინებათ, რომ ჩვენც შეგვიძლია მათთვის ზიანის მიყენება. მოკლედ, სასეირო კი არა, ეფექტური და შედეგიანი ფეხბურთი უნდა ვითამაშოთ. მოედანზე ტაშისთვის არ გავდივართ. უბრალოდ, გვინდა ჩემპიონთა ლიგის დონეზე ვითამაშოთ და ქულები დავაგროვოთ.
„თქვენ დღეს იურგენ კლოპს ეჯიბრებით”…
„კლოპის მეტოქეობა დიდი პატივია. მას მსოფლიოში არავინ ჰგავს, მისი მსგავსი საფეხბურთო ფილოსოფიას არავის აქვს. შევეცდები წავიკითხო, რას სთხოვს ის თავის გუნდს.
„გუნდის გამხნევებაში „მარადონას” რა როლის თამაში შეუძლია?”
„ძალიან კარგად მოგვეხსენება რა ძალის შემატება შეუძლია „მარადონას”. ეჭვი არ მეპარება, რომ ჩვენი გულშემატკივრის ხმა „ენფილდამდეც” მიაღწევს. ხალხის მხარდაჭერა ფეხბურთელების დაძაბულობას შეამცირებს და ძალიან დაგვეხმარება”.
