დღეს „ნაპოლი” „ლივერპულს” მასპინძლობს და წუხელ, მატჩისწინა პრეს-კონფერენციაზე, ინგლისური გუნდის გერმანელ მწვრთნელ იუგრგენ კლოპს ჰკითხეს, ნეაპოლი ინგლისელი გულშემატკივრებისთვის უსაფრთხო ქალაქი თუ არისო. ყველაზე დიდი რეზონანსი სწორედ ამ კითხვამ გამოიწვია.
ჩემპიონთა ლიგის გასული გათამაშების ფინალისტები ახალ ევროპულ სეზონს ხვიჩა კვარაცხელიას გუნდთან შეხვედრით იწყებენ, მაგრამ ისეთი შთაბეჭდილება რჩება, რომ ინგლისელები ხვიჩასა და მის თანაგუნდელებზე მეტად ნეაპოლელ ჯიბგირებს და ხულიგნებს უფრთხიან. წერენ, მაისში, პარიზულ ფინალში, ფრანგებს ხალხის სტადიონზე შეშვება ისე ცუდად ჰქონდათ ორგანიზებული და ისეთი სიმწარე გადაგვხვდა, რომ მას მერე მასპინძლებს ვუფრთხითო.
„უხერხულ კითხვას მისვამთ, — უპასუხა კლოპმა ჟურნალისტს, — თქვენ ხმაურიანი სათაური გჭირდებათ, მე კი ეს არ მომწონს. ნეაპოლიში არასდროს მიცხოვრია. ორიოდ დღით ვარ ჩამოსული, დაცვა დამყვება, სასტუმრომდე მივყავართ და მოვყავართ. როგორ გიპასუხებთ კითხვაზე, რას ვფიქრობ ქალაქის შესახებ? თუ სადმე ქუჩაში ფანი ფანს შეხვდება, არ არის გამორიცხული რაღაც მოხდეს, მაგრამ ეს კონკრეტულ ქალაქთან არ არის კავშირში. მე აქ იმიტომ არ ჩამოვსულვარ, თქვენ ხმაურიანი სათაურები რომ შეგიქმნათ”.
როგორც ზემოთ მოგახსენეთ, ეს კითხვა ჟურნალისტს ჰაერიდან არ მოუტანია. ორშაბათს ინგლისურმა კლუბმა გაავრცელა ვიდეო-ინსტრუქცია თავისი გულშემატკივრისთვის: რა უნდა გააკეთო, რომ ნეაპოლში უსაფრთხოდ იყო. მოკლე კლიპში „ლივერპულის” დირექტორი ენდი ჰიუზი ამბობს, რომ მათთვის მთავარი ფასეულობა ქომაგია და ფანებს მოუწოდებს ქალაქში, მითუმეტეს „ლივერპულის” მაისურებით მარტომ არ იარონ. ეს რჩევა იტალიაში ინგლისის საელჩოს გარდა ნეაპოლის პოლიციამაც მოგცათო, ურჩევს თანამემამულეებს ჰიუზი. ის ამბობს, რომ ინგლისელები დანიშნულ დროს, დანიშნულ ადგილას უნდა შეიკრიბონ და მათ დიეგო მარადონას სახელობის სტადიონისკენ საგანგებოდ გამოყოფილი ავტობუსებით მიიყვანენ.
რაც შეეხება კლოპის პრეს-კონფერენციის სხვა კითხვებს.
„ნეაპოლში წაგება? თუ სწორად მახსოვს, როგორც „დორტმუნდში”, ასევე „ლივერპულში”, როდესაც „ნაპოლის” შევხვდი, ფინალში გავედი. „ნაპოლის” სახელი ჟღერს, ამიტომ წინა შეხვედრებთან შედარებით უკეთ უნდა ვითამაშოთ”, — თქვა „ლივერპულის” თავკაცმა.
მეტოქე-კოლეგის ლუჩანო სპალეტის შესახებ დასმულ კითხვაზე გერმანელმა ასე უპასუხა: „მე სპალეტის მაშინ შევხვდი, როდესაც ის „ზენიტში” მუშაობდა. მის ასაკში, მის ტანზე რომ ვიდგე, ქუდი არ დამჭირდებოდა (იცინის). სპალეტის გუნდებს გამოკვეთილი ხელწერა აქვთ. ერთი სული მაქვს, როდის დადგება ხვალინდელი დღე და შევეჯიბრები.
„ნაპოლის” ბევრი ახლგაზრდა ფეხბურთელი ჰყავს, მაგრამ მაინც ძლიერი გუნდია. მეორე მხრივ, გუნდი რამდენიმე ვარსკვლავმა დატოვა და ამან მათ ბანაკში ღელვა გამოიწვია. ვფიქრობ, ისინი ახალ გუნდს დიდებული ფეხბურთელის პეტრ ჟელინსკის გარშემო აწყობენ. არ მიკვირს სპალეტი სიმშვიდეს რომ ინარჩუნებს. „ნაპოლისთვის” ის იდეალური მწვრთნელია”.
