„ნაპოლიმ” შინ „ლეჩესთან” 1:1 ითამაშა. ამ შეხვედრაში პარტენოპეელთა თავკაცმა ლუჩანო სპალეტიმ მოედანზე გადასხვაფერებული შემადგენლობა გაიყვანა. ეს გასაგებიცაა, კალენდარი დატვირთულია, ნეაპოლელები უახლოეს დღეებში ჯერ რომში „ლაციოს” ხვდებიან, ხოლო შემდეგ ჩემპიონთა ლიგაში „ლივერპულს” მასპინძლობენ. „ლაციოსთან” თამაში შაბათს, 3 სექტემბერს, საქართველოს დროით 22 საათსა და 45 წუთზე გაიმართება, „ლივერპულს” კი „ნაპოლი” შვიდში, ოთხშაბათს, 23 საათზე ხვდება.
„ლეჩესთან” ხვიჩა კვარაცხელია სასტარტო შემადგენლობაში არ იყო, ის მოედანზე 56-ე წუთზე შევიდა. მან შეცვალა 22 წლის ჩრდილო მაკედონიელი ელიფ ელმასი, რომელმაც ამ შეხვედრაში ნეაპოლელთა ერთადერთი გოლი გაიტანა. ის მარცხენა ფრთაზე ქართველის კონკურენტად ითვლება. მატჩის შემდეგ ელმასმა ტელეკომპანია RAI-ს უთხრა:
„კარგად ვითამაშეთ, მაგრამ ბოლო ნაბიჯი დაგვაკლდა, თითქოს დაუნდობლობა არ გვეყო. თუმცა, ამაზე ბევრი ფიქრის დრო არ გვაქვს, წინ სამ დღეში ერთხელ მნიშვნელოვანი შეხვედრები გველის. ჯობს ახლა დავისვენოთ და ყურადღება „ლაციოზე” გადავიტანოთ…
…დიახ, გუნდი ბევრმა ფეხბურთელმა დატოვა, მაგრამ გასახდელში ძველებური სულისკვეთებაა. ჩვენ გვყავს დიდებული მოთამაშეები, მაგალითად კაპიტანი ჯოვანი დი ლორენცო და სხვები, რომლებიც წლებია „ნაპოლიში” არიან. გვყავს ძალიან ძლიერი ახალწვეულები, რაშიც თავად დარწმუნდებოდით. ისინი დიდ დახმარებას გაგვიწევენ…
…მე უფრო ცენტრში მირჩევნია თამაში, ვიდრე მარცხენა ფრთაზე თუმცა თუ მწვრთნელი სხვანაირად გადაწყვეტს, ყველა ღონეს ვიხმარ, რომ შედეგი მოვიტანო. მთლიანად მის განკარგულებაში ვარ”.
შეგახსენებთ, რომ ელმასი და კვარაცხელია 24 სექტემბერს, თბილისში, საქართველოსა და ჩრდილო მაკედონიის ნაკრებების შეხვედრაში დაუპირისპირდებიან ერთმანეთს. ეს იქნება ერთა ლიგის C დონის მე-4 ჯგუფის შეხვედრა. საქართველოს 10 ქულა აქვს, მაკედონიას — 7.
