სულ რამდენიმე დღეში, 25 აგვისტოს გაიმართება მატჩი „ბიარიცსა“ და „ოიონაქსს“ შორის და ამით დასაბამი მიეცემა 2022-2023 წლების სარაგბო სეზონს. ტრადიციულად, საფრანგეთის მეორე ელიტური დივიზიონი პრო დ2 სხვა მნიშვნელოვან ტურნირებზე ოდნავ ადრე იწყება და რაგბის ქართველი ქომაგისთვის ეს უცხოური შეჯიბრება იმდენადაა საინტერესო, რამდენადაც მასში ყველაზე მეტი ქართველი ლეგიონერი მონაწილეობს. ესეც უკვე ერთგვარ ტრადიციად ჩამოყალიბდა.
კარსმომდგარ სეზონში პრო დ2-ის მონაწილე 16 გუნდიდან 15-ის განაცხადში მინიმუმ ერთი ქართველი იქნება და სულ კი მათი რიცხვი 51-ს (!) შეადგენს. ამ 51-ში შედიან როგორც გამოცდილი და სახელოვანი ბორჯღალოსნები, ასევე ნიჭიერი ახალბედები, რომელთაგან დიდმა უმრავლესობამ გარკვეული სახელი 18 და 20-წლამდელთა ნაკრებებში თამაშით უკვე დაიგდო. მათ შორის ყველაზე ახალგაზრდა 18 წლის კვაჭი ბასა ხონელიძე გახლავთ, რომელმაც „ორიაკის“ ესპუართა გუნდს საფრანგეთის ჩემპიონატის სენსაციურ მოგებაში მნიშვნელოვნად დაეხმარა, გაიტანა რა ფინალში ორი ლელო და მატჩის საუკეთესო მოთამაშის სტატუსიც მოიპოვა.
ყველაზე ასაკოვანი კი „კოლომიეს“ 36 წლის ბურჯი ბექა შეყლაშვილია, რომელსაც ეროვნული ნაკრების კვართი თავის საუკეთესო წლებში არაერთხელ მოურგია.
ამასთან, პრო დ2-ში ამ სეზონს არაერთი ამჟამინდელი ბორჯღალოსანი გაატარებს: მიშიკო ალანია, ლუკა ნიორაძე, ბექა შვანგირაძე, გიორგი ჯავახია, თორნიკე ჯალაღონია, ოთარ გიორგაძე, თედო აბჟანდაძე, ლაშა ჯაიანი და ლადო ჩაჩანიძე.
ძალიან შთამბეჭდავი კომაპანიაა, რომელსაც დიდ წარმატებებს ვუსურვებთ. დაბოლოს, მადლობა უნდა ვუთხრათ ორ დიდ ბორჯღალოსანს, რომელმაც კარიერა სულ ახლახან დაასრულა: კარლენ ასიეშვილი „რუანს“ ლიგაში ადგილის შენარჩუნებაში დაეხმარა, ხოლო საქართველოს ნაკრების ექს-კაპიტანმა შალვა სუთიაშვილმა „ანგულემს“ პრო დ2-ში დაბრუნების პირობა მისცა და შეასრულა კიდეც! ორივეს შესანიშნავი კარიერა ჰქოდა და ორივე თავაწეული წავიდა!
ქვემოთ გთავაზობთ პრო დ2-ის კლუბების განაცხადში შეყვანილ 51-ივე ქართველის ჩამონათვალს:
აჟენი (1): მამუკა მსტოიანი (20 წლის).
ანგულემი (4): ომარ ოდიშვილი (25), ოთარ კინწურაშვილი (19), საბა ფესვიანიძე (21), ირაკლი ცხადაძე (25).
ორიაკი (11): გიორგი ქართველიშვილი (30), ირაკლი მჭედლიძე (21), ლუკა ნიორაძე (23), ბასა ხონელიძე (18), გიორგი ჯავახია (25), ალექსანდრე ბურდული (20), ბექა შვანგირაძე (20), ნიკოლოზ საყვარელიძე (19), მიხეილ ალანია (21), დაჩი პაპუნაშვილი (20), გიორგი გოგოლაძე (24).
ბეზიე (2): ჟორჟი სალდაძე (28), გიორგი ახალაძე (23).
ბიარიცი (4): ლაშა ტაბიძე (25), გიორგი ნუცუბიძე (23), ლუკა აზარიაშვილი (22), თორნიკე ჯალაღონია (23).
კარკასონი (4): ვახტანგ ახობაძე (29), სოსო ბეკოშვილი (28), ლუკა პეტრიაშვილი (21), ნუგზარ სომხიშვილი (20).
კოლომიე (1): ბექა შეყლაშვილი (36).
გრენობლი (6): ზურაბ ჟვანია (30), ლუკა გოგინავა (25), საბა მიქელაშვილი (20), ირაკლი აფციაური (19), გიორგი მამაიაშვილი (19), გუგა ღანიაშვილი (19).
მასი (1): უშანგი ჭეიშვილი (24).
მონ-დე-მარსანი (1): ლაშა მაჭარაშვილი (23).
მონტობანი (3): მირიან ბურდული (31), ოთარ გიორგაძე (26), თედო აბჟანდაძე (23).
ნევერი (6): ილია კაიკაციშვილი (29), თორნიკე მატარაძე (25), ლაშა ფხაკაძე (19), ლაშა ჯაიანი (24), ლადო ჩაჩანიძე (22), რატი ზაზაძე (20).
ოიონაქსი (3): ირაკლი მირცხულავა (33), ალექსი სვიანაძე (22), დავით არველაძე (19).
პროვანსი (3): დავით გველესიანი (20), დავით გვიდიანი (22), გიგი ქურხული (19).
რუანი (1): ხვიშა ცოფურაშვილი (22).
