ბრიტანელი მილიარდერი სერ ჯიმ რეტკლიფი ადასტურებს, რომ „მანჩესტერ იუნაიტედის” ყიდვა უნდა. რაც შეეხება გუშინ გავრცელებულ ცნობას იმის თაობაზე, რომ იმავე კლუბის შეძენა სურს ილონ მასკსაც და მან ამის შესახებ ტვიტერში დაწერა კიდეც, ეს ექსცენტრული ბიზნესმენის ხუმრობა გამოდგა, რაც თავად აღიარა. ერთი ხნის მერე მასკმა დატვიტა, სპორტულ კლუბებს არ ვყიდულობო.
რეტკლიფი მრავალფუნქციური ქიმიური ინდუსტრიის კორპორაციის Ineos-ის მფლობელია. ის აპირებს „იუნაიტედთან” დაკავშირებით მის ახლანდელ პატრონებს, ამერიკელ ძმებს გლეიზერებს დაელაპარაკოს. რეტკლიფის პრეს-სპიკერმა თქვა: „თუ კლუბი იყიდება, ჯიმი მას ნამდვილად შეიძენს”.
ბრიტანელი ბიზნესმენი, რომლის ქონება 13 მილიარდ დოლარს უდრის, მას მერე გააქტიურდა, რაც „ბლუმბერგმა” გაავრცელა ინფორმაცია, რომ გლეიზერები „იუნაიტედის” მინორიტარულ პაკეტს ყიდიან.
