საჭადრაკო ოლიმპიადაზე საქართველოს ქალთა ნაკრებმა მეოთხე გამარჯვება მოიპოვა. ჩვენმა გოგონებმა მასპინძელ, ინდოეთის მესამე გუნდს 3:1 მოუგეს, რომელიც აქამდე ასევე დაუმარცხებლად მიდიოდა.
პარტია მხოლოდ ნინო ბაციაშვილმა დათმო, რომელმაც შავი ფიგურებით პვ ნანდჰინდჰაასთან წააგო. ნანა ძაგნიძემ თეთრებით ეეშა კარავადე დაამარცხა, ლელა ჯავახიშვილმა ასევე თეთრებით ვარჯიში საჰიტჰი, ხოლო სალომე მელიამ შავებით ბოდა პრატიუშას მოუგო.
აღსანიშნავია, რომ ჯავახიშვილს მეტოქე უკვე მე-12 სვლაზე დანებდა.
ოთხი ტურის შემდეგ ქულადაუკარგავი 8 გუნდი დარჩა. 8-8 ქულა აქვთ და ცხრილში ასეთი თანმინდევრობით განლაგდნენ: აზერბაიჯანი, პოლონეთი, უკრაინა, ინდოეთი, საფრანგეთი, ინდოეთი 2, საქართველო და რუმინეთი.
სამ გუნდს 7-7 ქულა აქვს, რომელსაც 6-ქულიანების დიდი ჯგუფი მოსდევს.
მომდევნო მატჩი ჩვენს ქალებს ისევ მასპინძლებთან აქვთ – ინდოეთის მეორე გუნდს ეთამაშებიან.
ლიდერთა შორი-ახლოს ტრიალებს ვაჟთა ნაკრებიც, რომელმაც მექსიკა 3.5:0.5 დაამარცხა. თავიანთი პარტიები მოიგეს: ბაადურ ჯობავამ შავებით ჯილბერტო გერერო ჰერნანდესთან; მიხელ მჭედლიშვილმა თეთრებით ფერნანდო ლუის აბარასთან; ლევან ფანცულაიამ, ასევე თეთრებით, მიგელ ანხელ მონტესთან; ლუკა პაიჭაძე კი, შავებით ხულიო სეზარ დიას როსას დაუზავდა.
ვაჟთა შორის მაქსიმალური შედეგი 5 გუნდს აქვს: ინდოეთი 2, სომხეთი, ისრაელი, ინგლისი და ესპანეთი. შემდეგ მოდის დიდი 7-ქულიანი ჯგუფი და კიდევ უფრო დიდი 6-ქულიანი ჯგუფი, სადაც საქართველოს ნაკრებიც არის.
მეხუთე ტურში ჩვენი ვაჟთა ნაკრები 47-ე განთესვის პარაგვაის ეთამაშება, რომელსაც ასევე 6 ქულა აქვს.
