ესპანურ მედიაში მწარედ ხუმრობენ, ამ ზაფხულს „ვალენსია” განსაწმენდელშია, რადგან სეზონი კარს მოსდგომია, მას კი სატრანსფერო ბაზარზე სერიოზული ჯერაც არაფერი უქნიაო. განსაწმენდელი კათოლიკე ქრისტიანთა რწმენით ის ადგილია, სადაც სამოთხეში მიმავალი სული სასუფევლამდე ხვდება და ნარჩენი ცოდვებისგან იწმინდება.
ადრეც დაგვიწერია, რომ „ჩეებმა” რამდენიმე ფეხბურთელი უნდა გაყიდონ, რათა ფინანსური პლიუს-მინუსი გაასწორონ და ახალი მოთამაშეების რეგისტრაცია შეძლონ. ვწერდით იმასაც, რომ გიორგი მამარდაშვილის ახალი კონტრაქტი ჯერჯერობით ასევე არ არის რეგისტრირებული. მის დღეში არიან უგო დურო, სამუ კასტილეხო, და სამუელ ლინო, რომელთა საქმეები მამარდაშვილის შემდეგ მოგვარდა.
ამბობენ, რომ კლუბი კვლავ აპირებს გონსალო გედეშის, კარლოს სოლერისა და ხოსე გაიას გაყიდვას, მაგრამ აქამდე ღირებული წინადადებით არავის მიუმართავს. და არის კიდევ ერთი მოთამაშე, რომლის გაყიდვაც აქტუალურია. ეს გახლავთ ჰოლანდიელი მეკარე ჯასპერ სილესენი.
სილესენი „ვალენსიას” ერთ-ერთი ყველაზე მაღალხელფასიანი ფეხბურთელია. როგორც AS წერს, „ღამურებს” ამხელა გასამრჯელოს გადახდა ხელს აშკარად არ აძლევთ, რადგან მის გარეშეც ჩინებულად გავლენ ფონს — მამარდაშვილი და ხაუმე დომენეკი მზად არიან ძელებს შორის ადგილი დაიკავონ.
შაბათს „ვალენსია” ინგლისში იყო, სადაც „ნოტინგემ ფორესტს” შეხვდა (1:1), ოღონდ სილესენი თან არ წაიყვანა. მას-მედია წერს, რომ „ღამურების” ახალი მწვრთნელი ჯენარო გატუზო ცდილობს სილესენს რამენაირად „ვალენსიადან” წასვლა აიძულოს.
სილესენი 33 წლის გახლავთ და ამ ასაკში მთხოვნელების რიგი რომ არ უდგას, გასაკვირი არ არის. სავარაუდოდ, მისი სარფიანად გაყიდვაც პრობლემაა. „ჩეებთან” ჰოლანდიელის კონტრაქტს ვადა ერთ წელიწადში გაუდის და თუ მყიდველი არ გამოჩნდა, ის ალბათ შეეცდება მაღალი ანაზღაურების ბოლო წელიწადი არ დაკარგოს.
