ესპანურმა plazadeportiva-მ გამოაქვეყნა წერილი, სადაც ქართველი ნახევარმცველის გიორგი ქოჩორაშვილის შესახებ წერს. ქოჩორაშვილის „ლევანტემ” ამხანაგურ შეხვედრაში 2:1 მოუგო ინგლისურ „ვულვერჰემპტონს”. შეცვლაზე შესულმა გიორგიმ დაახლოებით 20 მეტრიდან ეფექტური დარტყმით მეორე გოლი გაიტანა.
„ძალიან გახარებულები ვართ ამ შეხვედრაში რომ გავიმარჯვეთ. სეზონის წინ ტაქტიკური საკითხების დამუშავებას ექცევა საგანგებო ყურადღება. წინ მივდივართ ფიზიკური მომზადების თვალსაზრისითაც. „ვულვერჰემპტონი” პრემიერლიგის კლუბია და მასთან მოგებას დიდი ძალისხმევა სჭირდებოდა”, — თქვა ქართველმა ფეხბურთელმა, რომელმაც ხაზი გაუსვა, რომ ახალი სეზონისთვის მზადების პირველ ორ კვირაში ორი გამარჯვება გუნდისთვის მეტად სასარგებლო იყო. მისი აზრით „ლევანტემ” დაცვაში თამაშიც გვარიანად დახვეწა.
„არის მთელი რიგი ასპექტები, რომლებზეც მოსამზადებელ პერიოდში განსაკუთრებით ვამახვილებთ ყურადღებას. მომავალშიც ასეთივე მონდომებით უნდა განვაგრძოთ, რადგან წინ არანაკლებ მნიშვნელოვანი შეხვედრები გველის. ჩვენი ფეხბურთელების ოსტატობა შეტევაში, გოლების გასატანად უნდა გამოვიყენოთ,” — ამბობს 23 წლის ქოჩორაშვილი, რომელიც ამ ზაფხულს „ლევანტეს” სარეზერვო გუნდიდან პირველ გუნდში გადაიყვანეს.
გიორგის „ლევანტეს” მთავარ გუნდში 2020 წლის ივლისში აქვს ნათამაშები.
ქოჩორაშვილი განაგრძობს: „მოედანზე გატარებული ყოველი წუთი, სულერთია ხუთი იქნება თუ ოთხმოცდაათი, ძალიან მნიშვნელოვანია. ბედნიერი ვარ გოლი რომ გავიტანე. მწვრთნელთან ურთიერთობაშიც თავს კომფორტულად ვგრძნობ. უკეთესი შედეგებისთვის კიდევ უფრო მეტი უნდა ვიმუშაო”.
შეგახსენებთ, რომ ლა ლიგის გასულ სეზონში „ლევანტე” (ქალაქ ვალენსიას გუნდია) მე-19 ადგილზე გავიდა და ახალი სეზონში, სეგუნდა დივიზიონში, კვლავ უმაღლეს დონეზე დაბრუნებისთვის მოუწევს ბრძოლა.
