ინგლისის ნაკრების მწვრთნელმა გარეთ საუთგეიტმა განაცხადა, რომ ყატარში, მსოფლიოს ჩემპიონატზე არ წაიყვანს იმ ფეხბურთელებს, რომლებიც კოვიდის საწინააღმდეგო აცრას არ გაიკეთებენ. „დეილი მეილის” ცნობით იმ 26 ფეხბურთელიდან, რომლებიც შემოდგომაზე საუთგეიტმა ინგლისის ნაკრების განაცხადში უნდა შეიყვანოს, ბევრი ჯერაც აუცრელია. შესაბამისად, ამჟამინდელი რეგულაციების მიხედვით, ნოემბერში, როდესაც ისინი ყატარში ჩავლენ, ხუთი დღე თვითიზოლაციაში უნდა გაატარონ.
ინგლისის ნაკრებს პირველი შეხვედრა 21 ნოემბერს, ჩასვლიდან ექვსი დღის შემდეგ უწევს. შესაბამისად, ის ფეხბურთელები, რომლებიც ამ ხნის განმავლობაში ოთახში ისხდებიან და ვერ ივარჯიშებენ, პირველ ტურში ვერც ითამაშებენ. და გაირკვა, რომ საუთგეიტს უჯობს აუცრელი მოთამაშეები შინ დატოვოს, ვიდრე მუნდიალზე სკამი დაუმოკლდეს და მოთამაშეები დააკლდეს. სხვათა შორის, აგერ, ახლა, „ჩელსიმ” და „კრისტალ პალასმა” აუცრელი ფეხბურთელები სეზონის წინა შეკრებაზე არ წაიყვანეს.
სინგაპურში გამგზავრებულ „კრისტალ პალასს” მთავარი გუნდის 10 ფეხბურთელი ჰყოლია აუცრელი. არადა, სინგაპურში ასეთებს არ უშვებენ. 6 ივლისამდე აუცრელებს არ უშვებდნენ ავსტრალიაშიც.
აუცრელი მოთამაშეების პრობლემა მსოფლიოს ჩემპიონატის მონაწილე სხვა ქვეყნებსაც აქვთ, მაგალითად საფრანგეთის ნაკრებში ცოცხალი თავით არ იცრება ნგოლო კანტე, მაგრამ საფრანგეთს ინგლისისგან განსხვავებით ტურნირის პირველ დღეს არ აქვს თამაში.
როგორც ევროპულ მედიაში წერენ, ფიფა ცდილობს ყატარი დაიყოლიოს, რათა მსოფლიოს ჩემპიონატის პერიოდში ამ ქვეყანამ კოვიდ-რეგულაციები შეამსუბუქოს.
