სულ რაღაც ხუთი დღის წინ გარეთ საუთგეიტი ამბობდა, რომ ვერასდროს იტყვის უარს ისეთ სიამოვნებაზე, როგორიცა ინგლისის ნაკრების თავკაცობაა, მითუფრო როდესაც საკუთარ გულშემატკივარს უყვარხარ. წუხელ კი, ვულვერჰემპტონის „მოლინოზე” შეკრებილი 28 ათასი ფანი ზეზეულად რომ გამოგეკითხათ, გიპასუხებდნენ, რომ საუთგეიტს უჯობს ახლავე გაასწოროს ასოციაციასთან ანგარიში და ჩანთა ჩაალაგოს. ინგლისის ნაკრებმა ისტორიული სირცხვილი ჭამა, შინ 0:4 წააგო უნგრეთის ეროვნულ გუნდთან. ასე მწარედ ინგლისელები შინ 1928 წლის შემდეგ არ დამარცხებულან.
11 დღის წინ, როდესაც ერთა ლიგის A3 ჯგუფის თამაშები დაიწყო, ასეთ მარცხს ვერავინ წარმოიდგენდა. საუთგეიტი ლეგენდარული სერ ალფ რემზის (ძველი გულშემატკივრისთვის რამსეის) შემდეგ ყველაზე წარმატებული ინგლისელი მწვრთნელია. მისი ხელმძღვანელობით ნაკრები მსოფლიოს ჩემპიონატის ნახევარფინალსა და ევროპის ჩემპიონატის ფინალში გავიდა, მაგრამ ახლა, ზედ ყატარი 2022-ის წინ, ინგლისის ნაკრებს მისი ხელმძღვანელობით 2014 წლის კატასტროფული პერიოდის შემდეგ ყველაზე ცუდი დროება უდგას. 2014 წელსაც მსოფლიოს ჩემპიონატი იყო. ის ბრაზილიაში ჩატარდა. მაშინ ინგლისელებს როი ჰოჯსონი წვრთნიდა.
2014-ის მუნდიალზე, ჰოჯსონის ნაკრები ორ ტურში, ხუთ დღეში დაემშვიდობა შეჯიბრებას, ისე რომ ფეხბურთელებმა მალარიის აბების დალევაც ვერ მოასწრეს. მესამე თამაში უკვე ფორმალობა იყო.
„მოლინოზე” ქომაგებმა ინგლისელ ფეხბურთელებს სამარცხვინო შეხვედრის დასრულებამდე კარგა ხნით ადრე მოუწყეს ობსტრუქცია — „ბუუუ” ეძახეს. ჰარი მაგუაირს 85-ე წუთზე მოედანზე ჯერ ფეხი შედგმულიც კი არ ჰქონდა, რომ უკვე უსტვენდნენ. ის თამაშის მიწურულს შეცვლაზე შევიდა. მანამდე ჯონ სტუნზმა მეტოქეს იდაყვი ჰკრა, მეორე ყვითელი ბარათი მიიღო და მოედანი დატოვა.
როდის წააგო ბოლოს ინგლისის ნაკრებმა შინ ასე სასტიკად? დაახლოებით ერთი საუკუნის წინ, 1928 წელს, როდესაც შოტლანდიის ნაკრებმა „უემბლიზე” 5:1 გაიმარჯვა.
და კიდევ, ეს იყო ინგლისელთა ყველაზე დიდი მარცხი შინ და გარეთ 1964 წლის 30 მაისის შემდეგ, როდესაც რიოში, „მარაკანაზე”, პელეს ბრაზილიამ იმავე ანგარიშით, 5:1 იძალა.
ინგლისელებმა 11 დღეში მეოთხედ ითამაშეს ცუდად. ამ ოთხ შეხვედრაში გუნდმა კომბინაციიდან ერთი გოლიც ვერ გაიტანა — ზედიზედ ამდენი მოუგებელი შეხვედრა ბოლო რვა წელიწადში არ ჰქონია.
საუთგეიტის ნაკრები A3 ჯგუფის აუტსაიდერია და შეურაცხყოფილი, ცინიკური ინგლისური მედია წერს, რომ მათი გუნდი შეიძლება B ლიგაში გავარდეს, სადაც მონტენეგროს, ალბანეთის და… შოტლანდიის დონის გუნდებთან მოუწევს ბურთაობა. თუმცა, ამ ეტაპზე ყველაზე ცუდი ის არის, რომ ნოემბერში მსოფლიოს ჩემპიონატია. მანამდე ინგლისელებს ერთა ლიგის სექტემბრის თამაშები რჩებათ: მილანში იტალიასთან და „უემბლიზე” გერმანიასთან.
ბრიტანული მედიის აზრით, ასეთი ცუდი თამაშის გადაღლით ახსნა სწორი არ იქნება, რადგან სეზონის ბოლოს ყველა დაღლილია, განა მარტო ინგლისელები. კრიტიკოსებისთვის ყველაზე ცუდი ის იყო, რომ გუნდს აკლდა ოპტიმისტური სულისკვეთება, რომელიც 2018 წლის მსოფლიოს ჩემპიონატზე მოჭარბებულად შეენიშნებოდა.
უნგრეთი მსოფლიოს წლევანდელი ჩემპიონატის შესარჩევშიც ინგლისთან ერთად იყო ჯგუფში, რომელშიც პირველ ადგილზე საუთგეიტის გუნდი გავიდა. მაშინ უნგრელებმა მხოლოდ ანდორას და სან მარინოს აჯობეს, ინგლისს პოლონეთს და ალბანეთს კი ჩამორჩნენ და მეოთხე ადგილი დაიკავეს, მაგრამ ვულვერჰემპტონში პირწმინდად აჯობეს ამბიციურ მეტოქეს.
ოთხი თამაშის შემდეგ A3 ჯგუფის ცხრილს უნგრეთი ლიდერობს. მას ერთი ქულით ჩამორჩება გერმანია, რომელსაც კიდევ ერთი ქულით ჩამორჩება იტალია, ინგლისს კი იტალიელებზე სამი ქულით ნაკრები აქვთ — მან ორი შეხვედრის ფრედ თამაში მოახერხა და სულ ეს იყო.
