ხვალ, კვირას, 12 ივნისს, ერთა ლიგის C დივიზიონის მე-4 ჯგუფის მეოთხე ტურის შეხვედრაში საქართველოს ნაკრები ბულგარეთს მასპინძლობს. მესამე ტურში საქართველოს ნაკრებმა სკოპიეში ჩრდილოეთ მაკედონიას მოუგო 3:0, ხოლო ბულგარელებმა გიბრალტარში 1:1 ითამაშეს, რის შემდეგაც ბულგარეთის ფეხბურთის ფედერაციის (საფეხბურთო კავშირის) პრეზიდენტობის კანდიდატმა დიმიტარ ბერბატოვმა ქვეყნის საფეხბურთო საზოგადოებას მიმართა.
შეგახსენებთ, რომ 41 წლის ბერბატოვი თავის დროზე წარმატებული თავდამსხმელი იყო, რომელმაც მსოფლიო გულშემატკივარს თავი ყველაზე მეტად „მანჩესტერ იუნაიტედში” თამაშით დაამახსოვრა. ის გახლავთ ბულგარელ ფეხბურთელთა შორის საქართველოს ნაკრების კარში ყველაზე მეტი, 5 გოლის ავტორი.
ბერბატოვმა ფეისბუქის გვერდზე „რ-ევოლუცია აქ არის”, კავშირის ახლანდელი ხელმძღვანელობის გადადგომა და რიგგარეშე ყრილობის მოწვევა მოითხოვა.
„გიბრალტართან მატჩის შემდეგ სიტყვები ზედმეტია, მოქმედებაა საჭირო! და ამ მიმართულებით ერთადერთი სწორი ნაბიჯი ბულგარეთის საფეხბურთო კავშირის ხელმძღვანელობის გადადგომაა.
მათმა 15-წლიანმა მმართველობამ აქამდე მოგვიყვანა. აქამდე მოგვიყვანა მათმა არაადეკვატურმა, პროფესიონალიზმს მოკლებულმა მუშაობამ ბავშვებთან.
მოვუწოდებ მთელს საფეხბურთო საზოგადოებას: ნუ იქნებით ინდიფერენტულები! პასიურობა პოზიციაა. არ აქვს მნიშვნელობა ვინ ვისი გუნდიდან არის. ჩვენ ყველანი ბულგარელები ვართ. შვილებისთვის კარგი მომავალი ყველას აქ, ბულგარეთში გვინდა.
მივმართავ ყველა პიროვნებას, ყველა გულშემატკივარს, ყველა მშობელს, ვისაც შვილი ფეხბურთზე დაჰყავს, ყველას, ვინც ფეხბურთში მუშაობს და უნდა, რომ განვითარდეს: ნუ იქნებით ინდიფერენტულები! გამოხატეთ თქვენი შეხედულება. იბრძოლეთ თქვენი შვილების მომავლისთვის, რომელთაც ფეხბურთის თამაში უნდათ.
ისურვეთ ცვლილება. ბევრი კითხვა დაგროვდა. კიდევ რამდენ ხანს უნდა ვითმინოთ? რატომ ვარიდებთ თავს პრობლემებს და მათ გადაჭრას? როდემდე გვინდა ეს აგონია გაგრძელდეს? სად არის მორალი? სად არის პროფესიონალიზმი? სად არის გადაწყვეტილებები?
ყოველი თამაშის შემდეგ ფეხბურთის მმართველთაგან ვისმენთ, რომ ეს არის მათი შესაძლებლობები. დროა შანსი მივცეთ ხალხს, რომელთაც სხვა შესაძლებლობები, ფეხბურთის მენეჯმენტის სხვანაირი ხედვა, სხვა დამოკიდებულება აქვთ”.
ბერბატოვმა საზოგადოებას შეახსენა ის ბრალდებები, რომლებიც საფეხბურთო კავშირის მმართველების მიმართ ხშირად ისმის: „შავი ლოტო, კავშირები ამ ლოტოს იატაკქვეშა ლიდერებთან, კორუფცია, ნაკრების შეურაცხმყოფელი შედეგები, ჩვენი ფეხბურთისა და შვილების აღზრდა-განვითარების ელემენტარული მეთოდოლოგიის არარსებობა და ბევრი ბევრი სხვა”.
და ბოლოს: „ჩვენ გვინდა ბულგარეთის საფეხბურთო კავშირის ახლანდელი ხელმძღვანელობა გადადგეს, მოვიწვიოთ პატიოსანი ყრილობა და ერთხმად ავირჩიოთ ახალი, ლეგიტიმური პრეზიდენტი”, — წერს ბერბატოვი.
შეგახსენებთ, რომ ბულგარეთის საფეხბურთო კავშირის მოქმედი პრეზიდენტი ქვეყნის ისტორიაში ყველაზე წარმატებული ნაკრების მეკარე, 59 წლის ბორისლავ მიხაილოვია.
