საქართველოს საფეხბურთო ნაკრები ჩრდილოეთ მაკედონიაშია და ერთა ლიგის მე-3 ტურის მატჩისთვის ემზადება…
მაკედონიელებს საქართველო კარგად ახსოვთ. ან როგორ არ ემახსოვრებათ – ჩვენთვისაც და მათთვისაც ისტორიული მატჩი მოგვიგეს. ევროპის ჩემპიონატზე გასასვლელი თამაში თბილისში 0:1 წავაგეთ.
იმ ავადსახსენებელი შეხვედრის გარდა, მაკედონიელებს კიდევ ორჯერ შევხვდით და ორივე ერთნაირი ანგარიშით, 1:1 დასრულდა. მეტოქესთან მოგება რომ არ გვაქვს, აქაურ ქომაგებს ესეც აიმედებთ. მაკედონიელების დიდი ნაწილი ახლაც მოგებისთვის ემზადება.
სკოპიეს ქუჩებში გვხდებიან, გვესალმებიან და თან გვეუბნებიან, რომ აუცილებლად მოგვიგებენ. თუმცა, არის ხალხი, რომელიც პირიქით მიიჩნევს. გუშინ საფეხბურთო კლუბ „თელავის“ ყოფილი ფეხბურთელის, ვლადიმირ დიმიტროვსკის ძმას, ბოჟიდარს ვესაუბრეთ და აღნიშნა, რომ 2020 წლისგან განსხვავებით, მაკედონია ახლა უფრო სუსტია, ხოლო საქართველო ბევრად უფრო ძლიერი.
ეს მხოლოდ მისი აზრი არ არის – აქაურ საფეხბურთო წრეებში მოქმედი ადამიანების გარკვეული ნაწილიც ასე თვლის. თუმცა, იმასაც ამბობენ, რომ ახლანდელი მწვრთნელი ბლაგოია მილევსკი ბევრად უკეთესია, ვიდრე წინამორბედი იგორ ანგელოვსკი, ვისი ხელმძღვანელობითაც თბილისური მატჩი წავაგეთ.
დიდ გულზე არიან მაკედონიელი ფეხბურთელებიც – გერმანული „შტუტგარტის“ შემტევი დარკო ჩურლინოვი გამარჯვებას გეგმავს. მის აზრს იზიარებს მილან რისტოვსკიც. სავარაუდოდ, მაკედონიელებს მეორე რისტოვსკი – სტეფანი დააკლდება, რომელიც მცველია და ხვიჩა კვარაცხელიას ფლანგზე დგას.
სხვა მხრივ, გამოძახებულთა შორის მეტოქეს პრობლემები არ აქვს.
კარგი განწყობაა საქართველოს ნაკრებშიც და ვილი სანიოლის გუნდიც იმედიანად არის. 29 ფეხბურთელი, რომელიც სანიოლმა ამ მატჩებისთვის შეკრიბა, ჯანმრთელად არის და მატჩის გამოტოვება არ ემუქრება. თუმცა, ცხადია, ყველა განაცხადში ვერ მოხვდება. თუ ვის ათამაშებს ვილი სანიოლი ხვალ, ამაზე ფიქრობს და მატჩის დაწყებამდე ვერაფერს იტყვის. დღეს ჩვენი გუნდი „ტოშე პროესკიზე“ ივარჯიშებს, ხვალ კი, ამავე სტადიონზე ითამაშებს. შეგახსნებთ, რომ ჩრდილოეთ მაკედონიისა და საქართველოს მატჩი 9 ივნისს, 22:45 საათზე დაიწყება.
მიხეილ ჟორჟოლიანი სკოპიედან საგანგებოდ სარბიელისთვის
