„შავმა ლომმა“ თავისი აფრიკული თავგადასავალი მორიგი გამარჯვებით გააგრძელა. პირველმა ქართულმა სარაგბო ფრენჩაიზმა სამხრეთ აფრიკის ქალაქ ისტ ლონდონში ქარის თასის პირველი დივიზიონის მე-6 ტურში ადგილობრივი „ბორდერ ბულდოგზი“ ბონუსით – 35:5 დაამარცხა და 19 ქულა დააგროვა.
ქართველებმა სამხრეთ აფრიკაში რაც ითამაშეს, ყველაფერი მოიგეს, ანუ სამივევე გამართულ მატჩში იმარჯვეს. სულ პირველში კენიელი მეტოქის არგამოცხადების გამო ჩვენს გუნდს 5 ქულა და 28:0 მოგება ჩაეთვალა, ხოლო მე-4 და მე-5 ტურებში იგივე ანგარიშით მარცხი უკვე ქართული ფრენჩაიზის არყოფნის გამო დაფიქსირდა – „შავი ლომი“ ხომ ევროპაში „რაგბი ევროპის“ სუპერთასის მოსაგებად იყო დაბრუნებული. სამწუხაროდ, ქარის თასის ორგანიზატორებმა წინასწარ გაცემული დაპირება არ შეასრულეს და ქართველებს გაცდენილი თამაშების სხვა ვადებზე გადატანის ნება არ დართეს.
ლონდონში კი ჩვენმა ბიჭებმა ტურნირის აუტსაიდერი „მესაზღვრე ბულდოგები“ (ასე ითარგმნება „ბირდერ ბულდოგზ“) ნაფლეთებად აქციეს და მეორე ტაიმში ადგილობრივი რეფერის ძალიან ცუდი და მიკერძოებული მსაჯობა რომ არა, პირველი ტაიმის 28:0 ბოლოს მასპინძელთა გაცილებით დიდ სირცხვილს მოიტანდა.
ასეა თუ ისე, ჩვენმა ბიჭებმა მეტოქე ყველა კომპონენტში დაჯაბნეს, სრულად შავკანიანმა აფრიკულმა გუნდმა ერთობ უსუსური მეტოქის შთაბეჭდილება დატობა – არც სამხრეთაფრიკული ჯანი, არც სისწრაფე, არც სარაგბო ოსტატობა…
ხუთივე ჩვენი ლელო ფიზიკური უპიარტესობის ხარჯზე დაიდო – ქართველები ან მოლით შედიოდნენ ჩათვლის მოედანზე, ან მოლით დაწყებულ გათამაშებას აბოლოებდნენ ხაზის გარღვევით, ანდა შერკინებიდან ხელდახელ წამოღებული ბურთით ალელოვებდნენ „ბულდოგებს“. მასპინძლები აზარტულად კი ბურთაობდნენ, მაგრამ აშკარად ჩანდა, რომ „შავი ლომის“ ხანმოკლე ისტორიაში ეს იყო მისი ყველაზე სუსტი მეტოქე.
მომდევნო მატჩი ერთ კვირაშია – 28 მაისს 17 საათზე „შავი ლომი“ ველინგტონში იქაურ „კავალიერზს“ შეერკინება, რომელიც შედარებით მაალი დონისაა, ვიდრე „ბირდერ ბულდოგზი“.
