შეხვედრაში, რომელიც „ვალენსიასთვის” არაფერს წყვეტდა ბორდალასმა ექსპერიმენტული შემადგენლობით ითამაშა: ფულკიე სამკაციან ცენტრალურ დაცვაში გადაიყვანა, დიაკაბი კი ორი საყრდენი ნახევარმცველიდან ერთ-ერთის ფუნქციას ასრულებდა. ეს როლი მას დროდადრო ადრეც შეუსრულებია. უნდა ითქვას, რომ სტუმრებს რამდენიმე გადაღლილი ფეხბურთელიც არ ჰყავდათ მოედანზე. ამიტომ, გასაკვირი არაფერი იყო იმაში, რომ „ვალენსიამ” მატჩი თავდაცვით დაიწყო. სტუმრები ცდილობდნენ თავი გაერთმიათ ნიკო უილიამსზე მოხვავებული ჩაწოდებებისთვის, რომელმაც მუნიაინთან კარგი პარტნიორობა ააწყო.
მე-10 წუთზე „ვალენსიამ” „სან მამესის” მოედანზე, რომელიც ბილბაოს სტადიონის გადაცურვის გამო ელიფსურ ჩრდილს ქმნის, სინათლე დაინახა. მაქსი გომესი იერაის დაუსხლტა, მან კი ურუგვაელი თავდამსხმელი წააქცია. სოლერის დარტყმა უნაი სიმონმა აიღო.
პირველმა ეპიზოდმა „ვალენსიას” მხნეობა შემატა. სტუმრები მოედნის ცენტრში შედარებით იოლად კომბინირებდნენ.
22-ე წუთზე მამარდაშვილის უყურადღებობის გამო „კათედრალმა” (ბილბაოს „ატლეტიკის” მეტსახელია) გამაფრთხილებელი შეტევა ჩაატარა. ეს გახლდათ ქართველი მეკარის ერთადერთი შეცდომა, რომელმაც შემდეგ მთელი მატჩის განმავლობაში აჯობა ინიაკი უილიამსს — შეხვედრა ამ წყვილის დიდებული დუელით გამოირჩეოდა. პირველი ტაიმის მიწურულს კი თამაში რამდენჯერმე შეწყდა, ტრიბუნები მსაჯის გადაწყვეტილებებს აპროტესტებდნენ, ხოლო პაულისტამ სამწუხაროდ ინიაკი უილიამსთან ორთაბრძოლის დროს კოჭი იღრძო. ბრაზილიელის ჟესტიკულაცია მეტყველებდა, რომ ტრავმა სერიოზული იყო. მას ამაოდ ჰქონდა მოედანზე დაბრუნების იმედი. პაულისტას მაგივრად თამაშში უგო გუილამონი ჩაერთო.
შესვენების შემდეგ „ბილბაომ” ზეწოლა გააძლიერა. მასპინძლებისთვის „ვალენსიასგან” განსხვავებით ქულებს ევროტურნირზე მოსახვედრად აქვს მნიშვნელობა, მაგრამ სტუმრები თავს ოსტატურად იცავდნენ. ყოჩაღობდა ალდერეტე.
ბორდალასის ბიჭები საკუთარ საჯარიმოს არ მიეჯაჭვნენ. პერიოდულად ისინი კონტრშეტევას ცდილობდნენ. საქმეში კარგად ერთვებოდა ხესუს ვასკესი, თუმცა დამაგვირგვინებელი დარტყმის შემსრულებელი არ ჩანდა. მაქსი გომესს ტყვია-წამალი გამოელია.
ამასობაში კი გადაღმა კართან ინიაკი უილიამსი მამარდაშვილთან პირისპირ შევიდა. ქართველმა ფეხით სასწაულად ითამაშა და გოლი არ გაატანინა.
შეცვლებმა აჩვენა, რომ „ვალენსიას” მაინც ჰქონდა ამბიციები. მოედანზე შევიდნენ გედეში და რაჩიჩი, რომელმაც სტუმრების პირველი ზომიერად სახიფათო მომენტი შექმნა — თავური დაარტყა, ბურთმა კი ძელთან ახლოს ჩაიარა. რამდენიმე წუთში გედეშმა სცადა საჯარიმოს გარედან ისეთივე გოლის გატანა, როგორიც იმავე მეტოქეს თასის ნახევარფინალში შეუგდო, მაგრამ ამჯერად ააცილა.
თანდათანობით თამაშის რიტმი იკლებდა და „ვალენსიაც” ოსტატურად აკავებდა „როხიბლანკას” მანევრებს. სტუმარი გუნდის ფეხბურთელები ყოველი შეჯახების შემდეგ მოედანზე წვებოდნენ, რაც „სან მამესზე” შეკრებილ გულშემატკივარს აღიზიანებდა. მაგრამ, მსაჯებმა თამაშს შვიდი წუთი დაამატეს და სტადიონიც ემოციისგან აფეთქდა.
შემდეგ კი შედგა ინიაკისა და გიორგის ბოლო დუელი. მუიაინმა ბურთი ჯარიმიდან ჩააწოდა, უილიამსმა თავური დაარტყა, რასაც მამარდაშვილმა ფენომენალური პასუხი გასცა. ხოლო სადაც ქართველი მეკარე ვერ მიწვდა, იქ ხარიხამ შეასრულა თავისი საქმე და ზუსტად ისეთივე შეცდომით გამოწვეული ვილიალიბრეს თავური უკუაგდო. ეს იყო 99 წუთიანი დუელის ბოლოსწინა სეტი, ბოლოს კი მსაჯმა გუილამონს მეორე ყვითელი ბარათი ამოუღო და მოედნიდან გააძევა.
ვინსენტ ჩილეტი, superdeporte.es/
