გუშინ „მანჩესტერ იუნაიტედის” პორტუგალიელმა სუპერვარსკვლავმა კრიშტიანუ რონალდუმ მიმდინარე სეზონში 24-ე გოლი გაიტანა (18 პრემიერლიგაში). მან პენალტი დაარტყა. მანკუნიანელებმა „ბრანტფორდს” 3:0 მოუგეს. მიმდინარე სეზონში ეს იყო გუნდის ბოლო შეხვედრა „ოლდ ტრეფორდზე”. მისი დამთავრების შემდეგ ფეხბურთელებმა მოედანს წრე შემოუარეს, გულშემატკივარს დაემშვიდობნენ და სწორედ ამ დროს მიაძახა მსოფლიოს ხუთგზის საუკეთესო ფეხბურთელმა კამერას: ჩემი საქმე ჯერ არ დამთავრებულა! (I’m not finished)
კონტრაქტის თანახმად რონალდუმ „მანჩესტერ იუნაიტედში” კიდევ ერთი სეზონი უნდა ითამაშოს, მაგრამ არავინ იცის სინამდვილეში რა მოხდება. ზაფხულიდან გუნდს ახალი მწვრთნელი ეყოლება, ჰოლანდიელი ერიკ ტენ ჰაგი, რომელიც თავისებურად წარმართავს საქმეებს.
„იუნაიტედის” ახლანდელმა, დროებითმა მწვრთნელმა, გერმანელმა რალფ რანგნიკმა თქვა:
„დღევანდელი თამაშით თუ ვიმსჯელებთ, რატომაც არ უნდა დარჩეს რონალდუ მანჩესტერში? რატომაც არ უნდა დაეხმაროს გუნდს? თუმცა, ეს კითხვა მაინც სჯობს ერიკს და კრიშტიანუს დავუსვათ.
სამწუხაროდ, ტენ ჰაგთან კვლავ არ მილაპარაკია. ის „აიაქსს” ხელმძღვანელობს და ნიდერლანდების ჩემპიონატით არის დაკავებული. ჩვენ, ჩვენი საქმე გვაქვს.
ჩემი აზრით, „მანჩესტერ იუნაიტედს” აუცილებლად უნდა ჰყავდეს ორი ნომინალური, ნამდვილი თავდამსხმელი. კრიშტიანუ ცენტრალური ფორვარდი არ არის. მას არ უყვარს ამ პოზიციაზე თამაში, თუმცა გუნდისთვის მთავარი პოზიციები კი არა, თავდამსხმელების ხარისხია”.
