ვალენსიურმა დერბიმ „ღამურების” მოთმინების ფიალა აავსო. შაბათს „მესტალიაზე” გულშემატკივრები ყვიროდნენ, რომ ესპანეთის ფეხბურთის ფედერაციაში კორუფციაა, ხოლო ხოსე ბორდალასმა ხელი მსაჯებისკენ გაიშვირა. ლაპარაკია „ვალენსიასა” და „ლევანტეს” შორის გამართულ მატჩზე, რომელიც 1:1 დასრულდა. ამ შეხვედრის „მეფედ” ქართველი მეკარე გიორგი მამარდაშვილი დაასახელეს.
„მხოლოდ დღევანდელ შეხვედრაზე არ ვაპირებ ჩივილს. ბოლოხანს „ვალენსიას” წინააღმდეგ ტენდენციას ვატყობ. მსაჯების ქცევა შემაშფოთებელია. მწვრთნელებიც გვიტევენ. ჩვენი უხეშობის შესახებ იმდენს ლაპარაკობენ, რომ ეტყობა არბიტრებიც იჯერებენ და გავლენის ქვეშ ექცევიან”, — თქვა მან.
ჯერ კიდევ 6 თებერვალს, „სამეფო თასის” ნახევარფინალის წინ, „ვალენსიასა” და „რეალ სოსიედადის” შეხვედრაში მსაჯმა სანჩეს მარტინესმა მაქსი გომესის აშკარა წაქცევის გამო პენალტი არ დანიშნა.
„გვეგონა, ტექნოლოგიები არბიტრების დასახმარებლად შემოიღეს, მაგრამ დაუჯერებელ რაღაცებს ვხედავთ. ვერაფრით ამიხსნია მეტოქის დაგდებისას ზოგჯერ რატომ უსტვენენ, ზოგჯერ კი არა” — თქვა ბორდალასმა.
10 თებერვალს „სან მამესზე”, „ბილბაოსა” და „ვალენსიას” ნახევარფინალური შეხვედრა გაიმართა. ჩანაწერში ჩანს, რომ ერთ-ერთ ეპიზოდში ვივიანი უგო დუროს წინააღმდეგ წესს ისე არღვევს, რომ მხოლოდ პენალტი კი არ უნდა დაინიშნოს, არამედ ბილბაოელი უნდა გააძევონ კიდეც. მეორე ეპიზოდში, მასპინძლების გოლის წინ, კარლოს სოლერი მუნიანს არ ეუხეშება ანუ მოვლენები სხვანაირად უნდა განვითარებულიყო, ხოლო მოგვიანებით, დანი გარსია იმავე სოლერის წინააღმდეგ უხეშობისთვის წითელ ბარათს იმსახურებს.
ბორდალასი: „გასახდელში რომ დავბრუნდით, ჩანაწერი ვნახეთ და ყველამ აშკარად დავინახეთ, რომ მსაჯს პენალტი უნდა დაენიშნა. გაუგებარია, რატომ არ შეამოწმა VAR-მა ეს ეპიზოდი. იგივე შეიძლება ითქვას სოლერის შემთხვევაზე. გარსიას ულაპარაკოდ ეკუთვნოდა წითელი ბარათი”.
11 აპრილს „ვალენსიამ” მადრიდში „რაიო ვალეკანოს” წინააღმდეგ ითამაშა. ამ შეხვედრაში ვერც მსაჯმა დაინახა, როგორ წააქცია საჯარიმოში პაულისტა ოსკარ ვალენტინმა და არც VAR-მა შეუსწორა არბიტრს. პრეს-კონფერენციაზე ბორდალასმა თქვა, რომ VAR-ში ბედი არ სწყალობს.
16 აპრილი. „ვალენსია” „ოსასუნას” მასპინძლობს. მელერო ლოპესი ვერ ხედავს რა აშკარად წააქცია საჯარიმოში ლუკას ტორომ ბრაიან ხილი. ამავე შეხვედრაში „ღამურებს” ორი გოლი არ ჩაუთვალეს.
„ეტყობა VAR ჩვენს სასარგებლოდ არ მუშაობს. ბრაიანის წაქცევისთვის პენალტი არ დანიშნეს. ტორო მეორე ყვითელს იმსახურებდა. ეს ყველაფერი ჩვენს მცველებს რომ გაეკეთებინათ, ბორდალასის თამაშის სტილზე დაიწყებდნენ ლაპარაკს”, — თქვა ბორდალასმა.
და 30 აპრილი. „ვალენსია” — „ლევანტე”. ხოსე ლუის გაია ტყუილად გააძევეს მოედნიდან.
ბორდალასი: „სანამ მეტოქე ანგარიშს გაათანაბრებდა, მაქსის წინააღმდეგ იუხეშეს ანუ ეპიზოდი სხვანაირად უნდა გაგრძელებულიყო. აღარაფერს ვამბობ იმაზე, რომ სონი ულაპარაკოდ იმსახურებდა მეორე ყვითელ ბარათს. ის სიმულანტობდა, მსაჯის მოტყუებას და პენალტის თაღლითურად მოპოვებას აპირებდა. ეს რომ „ვალენსიას” ფეხბურთელს გაეკეთებინა, მსაჯი უეჭველად გააძევებდა მოედნიდან”.
