იურგენ კლოპის „ლივერპულმა” ჩემპიონთა თასის ნახევარფინალში „ვილიარეალს” 2:0 მოუგო, ინგლისელმა ვეტერანებმა რიო ფერდინანდმა, მაიკლ ოუენმა და პიტერ კრაუჩმა კი ერთხმად აღიარეს, რომ მერსისაიდელებს ასეთი გუნდი მათ მეხსიერებაში არ ჰყოლიათ.
პირველი გოლი თავის კარში ფორმალურად ეკვადორელმა პერვის ესტუპინანმა გაიტანა (ჯორდან ჰენდერსონის დარტყმა რიკოშეტით ბადეში შევარდა), მერე კი სადიო მანემ მო სალაჰის პასით ახლოდან მიაღწია მიზანს. ეს ორწუთიან მონაკვეთში, 53-ე და 55-ე წუთებზე მოხდა.
თამაშის სტატისტიკა „წითლების” დიდ უპირატესობაზე მეტყველებს: ბურთის ფლობა 74:26; კარისკენ დარტყმა: 19:1; კარში დარტყმა 5:0; კუთხურები 10:2; პასები: 737:272.
„მანჩესტერ იუნაიტედის” ყოფილი ვარსკვლავი რიო ფერდინანდი: „ასეთი ძლიერი „ლივერპული” არასდროს მინახავს. ის შეუბრალებელი გუნდია. შეხედეთ, როგორ პრესინგს ეთამაშებიან მეტოქეებს, რა ენერგია აქვთ, რა ძალისხმევას დებენ. ისღა დაგვრჩენია, ვისხდეთ და აღფრთოვანებულებმა ვუყუროთ”.
ძველი ლივერპულელი მაიკ ოუენი: „მერსისაიდელებმა „ვილიარეალს” პულსი დააკარგვინეს. ეს იყო „ლივერპულის” სრული ბატონობა. „წითლების” ასეთი ძლიერი გუნდი არასდროს მინახავს. „ვილიარეალის” ფეხბურთელები მოედნიდან რომ გადიოდნენ ალბათ ფიქრობდნენ: ნეტავ რა დაგვეცა თავში? ამ პრესინგისთვის წინააღმდეგობის გაწევა შეუძლებელი იყო”.
სამართლიანობისთვის მაინც უნდა ითქვას, რომ პირველ ტაიმში უნაი ემერის ბიჭები მასპინძლებს წინააღმდეგობას უწევდნენ, მაგრამ მიჯრით გაშვებულმა ორმა გოლმა ყველაფერი შეცვალა.
მერსისაიდელების ყოფილი თავდამსხმელი პიტერ კრაუჩი: „მეც შემიძლია ვთქვა, რომ ასეთი „ლივერპული” არასდროს მინახავს. სამწუხაროდ, 70-იანი წლების გუნდი არ მახსოვს, მაშინ პატარა ვიყავი, იმ „ლივერპულებს” შორის კი, რასაც გააზრებით ვუყურე, ასეთი ძლიერი გუნდი არ მახსენდება. „ვილიარეალი” ძლიერია, ის კარგად თამაშობს პასებით, მაგრამ მთელი შეხვედრის განმავლობაში თავის გამოჩენის საშუალება ერთი წამითაც არ მიეცათ. დღეს ჩვენ ფანტასტიკური პრესინგი ვნახეთ. საოცრად თამაშობდნენ ნახევარმცველები ტიაგო და ფაბინიო. ჰენდერსონიც ძალიან კარგი იყო. ძნელი წარმოსადგენია, რომ საპასუხო მატჩში „ვილიარელმა” რამე მოახერხოს”.
„ლივერპული” მიმდინარე სეზონში ოთხი ჯილდოს მოგებისთვის იბრძვის. მათ უკვე გაიმარჯვეს ლიგის ანუ „კარაბაოს” თასზე. ფინალში პენალტებით მოუგეს „ჩელსის”.
14 მაისს, ფეხბურთის ასოციაციის თასზე მერსისაიდელები კვლავ დასავლეთ ლონდონელებს უნდა შეხვდნენ.
პრემიერლიგაში კი „წითლები” ერთი ქულით ჩამორჩებიან „მანჩესტერ სიტის”. სეზონის დამთავრებამდე სამი ტურია.
