„დეილი მეილის” ექსკლუზიური ინფორმაციით „მანჩესტერ სიტიმ” ერლინგ ჰოლანდის ყიდვის საქმეში დიდი ნაბიჯი გადადგა — „ქალაქელები” 21 წლის ნორვეგიელს კვირაში 500 000 გირვანქის გადახდას დაყაბულდნენ. ჰოლანდს პრემიერლიგაში ყველაზე დიდი ჯამაგირი ექნება.
ახლა, მანკუნიანელებს „დორტმუნდისთვის” თავდამსხმელის გამოსასყიდი 63 მილიონი გირვანქა (76 მილიონი ევრო) აქვთ გადასახდელი და თუ რაიმე მოულოდნელმა დაბრკოლებამ არ იჩინა თავი, ხუთწლიანი კონტრაქტი დაახლოებით ერთ კვირაში გაფორმდება.
რამდენიმე დღის წინ „დორტმუნდი” აცხადებდა, რომ „სიტისთან” შეთანხმებული ჯერ არაფერი აქვს და ალტერნატიულ ვარიანტებსაც განიხილავს. ლაპარაკი იყო „რეალსა” და „პარი სენ ჟერმენზე”.
გერმანელებს იმის იმედიც ჰქონდათ, რომ თავდამსხმელი მათთან კიდევ ერთ წელიწადს დარჩებოდა, მაგრამ „სიტიმ” ქისას დაუნანებლად მოხსნა პირი. ბევრჯერ დაგვიწერია, რომ მანჩესტერელთა მწვრთნელი პეპ გვარდიოლა თავდამსხმელის ძიებაშია. გასულ ზაფხულს მას „ტოტენჰემ ჰოთსფურისგან” ჰარი კეინის გადაბირება უნდოდა, მაგრამ ვერ მოახერხა. მართალია, 31 ტურის შემდეგ პრემიერლიგის ცხრილში „სიტი” პირველ ადგილზეა, მაგრამ გვარდიოლას თავისი გუნდის შეტევის სიმწვავე არ აკმაყოფილებს.
ინგლისში, კერძოდ ლიდსში დაბადებულმა ჰოლანდმა, რომელიც „დორტმუნდამდე” „ზალცბურგში”, „მიოლდესა” და „ბრინეშიც” თამაშობდა, შაბათს „ვოლფსბურგს” ორი გოლი გაუტანა („დორტმუნდმა” 6:1 მოიგო). ახლა მას მიმდინარე სეზონში კლუბსა და ნაკრებში ჩატარებულ 31 შეხვედრაში 33 გოლი აქვს გატანილი.
ზემოთ ვთქვით, რომ ჰოლანდს „სიტი” კვირაში ნახევარ მილიონს გადაუხდის. შედარებისთვის: ისეთ ვარსკვლავს, როგორიც არის კევინ დე ბრუინი, „ქალაქელები” კვირაში 385 000 გირვანქას უხდიან.
თუ გარიგება შედგება, ჰოლანდს ახალ გუნდთან ერთად ივლისში აშშ-ში მოუწევს გამგზავრება, ივნისში კი ნორვეგიის ნაკრებთან ერთად ერთა ლიგაში ელის ოთხი თამაში, რომელთაგან ბოლო მეზობელ და შესაბამისად მოქიშპე შვედეთთან არის უწევს.
