ეს 52 წლის ოლეგ სალენკოა, უკრაინელი, რომელმაც რუსეთის ნაკრებში ითამაშა და 1994 წლის მონდიალზე კამერუნს 5 გოლი გაუტანა. თანაბომბარდირი გახდა ხრისტო სტოიჩკოვთან ერთად.
სალენკო სანკტ-პეტერბურგში დაიბადა, თავიდან „ზენიტში“ თამაშობდა, საიდანაც კიევის „დინამოში“ გადავიდა და სახელიც იქ გაითქვა. რუსეთის ნაკრებში მხოლოდ 8 მატჩი ჩაატარა და 6 გოლი გაიტანა… მანამდე ერთი მატჩი უკრაინის ნაკრებშიც ითამაშა.
იყო „ვალენსიაში“, „გლაზგო რეინჯერსში“. სალენკო კიევში ცხოვრობს და ქალაქიდან გასვლას არ აპირებს.
აი, რა თქვა რუსულ აგრესიაზე: „ცხოვრება მაკვირვებს. 90-იან წლებში ჯერ კიდევ სანკტ-პეტერბურგში ყოფნისას მესმოდა ქალაქის მერ სობჩაკის დაცვის წევრზე. და აი, ის დაცვის წევრი 22 წელიწადია მეთაურობს ქვეყანას, რომელსაც ატომური ბომბი აქვს. სავარაუდოდ, მას თავბრუ ესხმის ძალაუფლებისგან. ისევე როგორც ლუკაშენკოს, რომელიც 28 წელიწადია ბელარუსის სათავეშია. ამერიკელებმა თავის დროზე სწორად დააკანონეს: ორი ვადა და საკმარისია“.
რამდენიმე დღის წინ კი სალენკომ ეს თქვა: „სანკტ-პეტერბურგში ველაპარაკე ხალხს, მაგრამ იქაც ვერაფერი გავიგე. მათ ჰგონიათ, რომ ეს ომი ნორმალურია. ეს ყველაზე საშინელებაა. ჩემი ყოფილი მეუღლეც კი ასე ფიქრობს და ამასწინათ ვერ მოვითმინე, მოვისროლე. ვეუბნები: „შეხედე, უკვე ბავშვებსაც ისე კლავენ, ვითომც არაფერი“. თუმცა ჯერ ვერ ხვდება“.
