პოლ პოგბამ თქვა, ჩემი კარიერის საუკეთესო წლები „მანჩესტერ იუნაიტედში“ გავფლანგეო. 89 მილიონ გირვანქად ნაყიდი ფრანგი ვარსკვლავის კონტრაქტს ზაფხულში ვადა გაუდის, ის თავისუფალი აგენტი გახდება.
იმაში, რომ მსოფლიოს ჩემპიონის გადაბირება „იუვენტუსს“, „რეალსა“ და „პარი სენ ჟერმენს“ უნდა, ახალი არაფერია, მაგრამ ამ სამ კლუბს ორიც დაემატა: ახალი გამდიდრებული „ნიუკასლ იუნაიტედი“ და „ასტონ ვილა“.
პოგბამ თქვა: „ბოლო ხუთ წელიწადში მოსაწონი არაფერი მომხდარა. აბსოლუტურად არაფერი. ეს სეზონიც მკვდარია, ვერაფერს მოვიგებთ. არადა, „მანჩესტერ იუნაიტედთან“ იქნება ეს თუ სხვა კლუბთან, მე ტიტულების მოგება მინდა“.
29 წლის ნახევარმცველმა ისიც თქვა, რომ მისი საქმე ცუდად მას მერე წავიდა, რაც „იუნაიტედის“ მწვრთნელი ჟოზე მოურინიუ გახდა.
„ყველაფერი ცუდი მაშინ დაიწყო, როდესაც „მანჩესტერ იუნაიტედში“ ჟოზეს ხელქვეით აღმოვჩნდი. ისეთი რამ, რაც მაშინ ხდებოდა, ცხოვრებაში არ განმეცადა და თავიდან საკუთარ თავს ვეკითხებოდი ჩემი ბრალი ხომ არ იყო ყველაფერი.
განა ყველა, ვინც ფულს შოულობს ბედნიერია? ასე არ ხდება ცხოვრებაში. ფეხბურთში სხვანაირადაა. ბოლოს და ბოლოს ფეხბურთელები სუპერგმირები ხომ არ ვართ, ჩვეულებრივი ადამიანები ვართ“.
ამ დღეებში პოგბა საფრანგეთის ნაკრების ბანაკშია, სადაც თავს უფრო კომფორტულად გრძნობს ვიდრე „მანჩესტერ იუნაიტედში“.
პოგბა: „საფრანგეთის ნაკრებში ყველაფერი უფრო ადვილია. აქ ჩემთვის მოხერხებულ პოზიციაზე ვთამაშობ. ვიცი რა როლი მეკისრება და ვიცი, რომ მწვრთნელი და თანაგუნდელები მენდობიან.
გასაკვირი იმაში, რომ ნაკრებში თავს სხვანაირად ვგრძნობ, ხოლო „მანჩესტერ იუნაიტედში“ სხვანაირად, არაფერია. ძნელია სტაბილურად მაღალ დონეზე ითამაშო, როდესაც ხშირად გიცვლიან პოზიციას, ხშირად ცვლიან მთელი გუნდის სათამაშო სქემას და სულ ახალ-ახალ პარტნიორებთან გიწევს შეჩვევა.
დიდიე დეშამთან კი საერთო ენა მაქვს ნაპოვნი. ის მე მავალებს იმას, რის კეთებაც კარგად ვიცი. „მანჩესტერ იუნაიტედში“? მაქვს კი ამ გუნდში საერთოდ რამე როლი? ამ კითხვას მუდმივად ვსვამ, მაგრამ პასუხს ვერავისგან ვიღებ“.
შემდეგ პოლ პოგბამ საფრანგეთის ნაკრები შეაქო.
“აქ ყველა კარგად ვგრძნობთ თავს, ვმეგობრობთ. ყველა საქმეშია ჩაფლული. დარწმუნებული ვარ, ვისაც უნდა ჰკითხოთ, ასევე გიპასუხებთ. საფრანგეთის ნაკრები ოჯახივით არის. მიუხედავად იმისა, რომ ნაკრებში იშვიათად ჩამოვდივართ და რამდენიმე დღეში კლუბებში ვბრუნდებით, ის ჩემი სახლია“.
„მანჩესტერ იუნაიტედი“ კი სულ ახლახან ჩემპიონთა ლიგიდანაც გავარდა. მას „ატლეტიკომ“ აჯობა. იმ დღეს, როდესაც პოგბა მადრიდში იყო სათამაშოდ, ინგლისში მისი სახლი გაქურდეს. ფეხბურთელის ორი შვილი ამ დროს შინ იყო, ძიძასთან ერთად. ფეხბურთელს მსოფლიოს ჩემპიონის მედალიც კი მოპარეს.
„დედაჩემის სამკაულები და ჩემი მსოფლიოს ჩემპიონის მედალი წაიღეს. თუმცა, ყველაზე მეტად იმან შემაშინა, რომ ამ დროს ჩემი შვილები შინ იყვნენ.
კიდევ კარგი ძიძამ ქურდების ლაპარაკს ყური მოჰკრა, მერე ჩემს ცოლს და დაცვას დაურეკა, თვითონ კი ბიჭებთან ერთად ოთახში ჩაიკეტა. რამდენიმე დღე შოკში იყო.
მთავარია, რომ ბავშვები კარგად არიან“.
