თბილისური თოვლი, სასწრაფო, შედევრი…

სხვა „ბათუმი“ და ჯანო

თოვლიანობის გამო ელიგის მეოთხე ტური ნაკლული გამოდგა. ორი თამაში: „დინამო“ – „დილა“ და „ტორპედო“ –  „ლოკომოტივი“ გადაიდო (ლიგა 2-ში სულაც 4 შეხვედრა ვერ ჩატარდა).

პირველ სამ ტურში არცერთი ფრე დაფიქსრებულა. ამჯერად კი სამიდან ორი მატჩი დასრულდა.

პირველი, ბათუმური 2:2 გახლდათ. მოქმედმა ჩემპიონმა თამაში ცუდად დაიწყო. ძნელი სათქმლია რისი ბრალი იყო ეს, ზედმეტი თავდაჯერებულობის თუ უბრალოდ შემთხვევის, მაგრამ ზღვისპირელთა დაცვა ისეთ შეცდომებს უშვებდა, დამწყებ მოყვარულებსაც რომ არ ეკადრებათ. გოლიც ლოგიკურად მიიღეს საკუთარ კარში.

„საბურთალო“ ორჯერ იგებდა და ბათუმელებმა ორჯერვე გაათანაბრეს. ამ მხრივ გია გეგუჩაძის შეგირდებს ბრძოლისუნარიანობას ვერ დაუწუნებთ. ბოლომდე იბრძოდნენ.

სხვა მხრივ, „ბათუმმა“ ზედიზედ მეორე მატჩი ვერ მოიგო.

ცალკე უნდა ვთქვათ ჯანო ანანიძეზე, რომლის  დაბრუნებას ყველა დიდი იმედით ველით. ჯანო დიდი ხნის შემდეგ პირველად გამოჩნდა სასტარტო შემადგენლობაში, მაგრამ ტაიმიც ვერ ჩაამთავრა. 24-ე წუთზე ის გიორგი ზარიამ შეცვალა. როგორც გვაცნობეს, ჯანოს სუნთქვის პრობელემები შექმნია.

უჩა, გოდერძი და სასწრაფო

პირველი ქულა მოიპოვა ახალწვეულმა „სიონმა.“ არცთუ ცუდი დებიუტი გამოუვიდა ბილნისელთა ახალ მთავარ მწვრთნელს, უჩა სოსიაშვილს. რამდენიმე დღის წინათ მან ამ პოსტზე გიორგი დარასელია შეცვალა.

უჩას ყოფილ გუნდთან მოუწია დაპირისპირება. სწორედ სოსიაშვილი გახლდათ „სამგურალის“ დამრიგებელი, როცა იმერული კლუბი 2020-ში ელიტაში აღაზევდა. შარშან აპრილში კი დაითხოვეს.

საინტერსოა, რომ გასულ სეზონში  სოსიაშვილი პირველი დამრიგებელი იყო, ვინც გაათავისუფლეს. ამჯერად კი პირველი მწვრთნელია, რომელმაც სხვა სპეციალისტი შეცვალა. ეს  ორივე ამბავი პირველ წრეში მოხდა.

ამ შეხვედრაში ერთი საწყენი ფაქტიც მოხდა. თამაშის დაწყებიდან დაახლოებით ნახევარი საათი გასულიყო, როცა ბოლნისელთა მცველი გოდერძი მაჩაიძე მეტოქეს უხერხულად შეეჯახა და საქმეში სასწრაფო დახმარების ექიმების ჩარევაც გახდა საჭირო. ის საავადმყოფოში გადაიყვანეს.

კვერნაძის შედევრი

„გაგრამ“ „თელავს“ „დინამო არენაზე“ უმასპინძლა. მოგეხსენებათ, მიმდინარე სეზონში „გაგრა“ საშინაო მატჩებს სწორედ ქვეყნის მთავარ სარბიელზე მართავს. მატჩი კარგი საცქერი გამოდგა და ანაგარიშიც, ალბათ ლოგიკურია. მაგრამ იყო ერთი ეპიზოდი, რომელის გამორჩევაც ღირს. 43-ე წუთზე თელაველთა 19 წლის ახლაწვეულმა, გიორგი კვერნაძემ, მეტოქის საჯარიმოში ოთხ მცველს შორის მოახერხა გაძრიმა, შემდეგ მეხუთესაც დაასწო და ულამაზესი გოლი გაიტანა. ასეთები საქართველოში იშვიათად გვინახავს. ძალიან სწრაფად გააკეთა ყველაფერი.

ეს კვერნაძის მეორე გოლია სეზონში, მანამდე მან მეორე ტურში „სიონთან“ (2:0) გამოიჩინა თავი – ერთი გოლი თავად შეაგდო, შემდეგ კი ლაშა ქოჩლაძეს გაატანინა.

„დინამო“ – „დილას“ შეხვედრა გადაიდო, რადგან თბილისში წამოთოვა და მატჩის დელეგატმა თამაში შეუძლებლად მიიჩნია.

დაბოლოს, ამავე შეხვედრაში სეზონის პირველი ვერგატანილი პენალტიც ვიხილეთ. თელაველ გურამ გოშთელიანს გაგრელმა ბექა ქურდაძემ აუღო, მაგრამ გამოვარდნილ ბურთზე ყველას ფირუზ მარაქველიძემ დაასწრო და ანაგრიში გაათანაბრა.

გიორგი ჭელიძის „თელავი“ ერთადერთ წაუგებელ გუნდად რჩება ლიგაში.

ბათუმი 2:2 საბურთალო

0:1 სიხარულიძე (26), 1:1 ფლამარიონი (38), 1:2 ნონიკაშვილი (65), 2:2 ბიძინაშვილი (76)

სამგურალი 1:1 სიონი   ზესტაფონში

1:0 რუხაძე (17), 1:1 ხორხელი (54)

გაგრა 2:2 თელავი

1:0 შონია (7), 1:1 მარაქველიძე (10), 1:2 კვერნაძე (43), 2:2 ხოსიტაშვილი (65 პენ)

მე-10 წუთზე გოშთელიანმა (თელავი) ვერ გაიტანა პენალტი

დინამო – დილა                       გადაიდო

ტორპედო  ლოკომოტივი           გადაიდო

მეგოლეები ჯოვინო ფლამარიონი (ბათუმი) – 4, ირაკლი ბიძინაშვილი (ბათუმი), ირაკლი რუხაძე (სამგურალი) – 3, ირაკლი სიხარულიძე, იური ტაბატაძე (ორივე – საბურთალო), ვლადიმერ მამუჩაშვილი (ბათუმი), გიორგი კვერნაძე (თელავი), დემურ ჩიხლაძე (სამგურალი), მათე ვაწაძე (გაგრა) – 2