კრიშტიანუ რონალდუ უდიდესი ვარსკვლავია, ოღონდ ესაა, „მანჩესტერ იუნაიტედში“ მისი დაბრუნება ზღაპრულ გეგმას აცდა. მსოფლიოს ხუთგზის საუკეთესო ფეხბურთელი შარშან ზაფხულში მივიდა „ოლდ ტრეფორდზე“, რათა თავისი სიყმაწვილის გუნდს ტიტულების მოპოვებაში დახმარებოდა, მაგრამ… თვითონ დარჩა ტიტულის გარეშე. ასეთი რამ მას 12 წელიწადია არ დამართია.
„მანჩესტერ იუნაიტედი“ ჩემპიონთა ლიგიდან „ატლეტიკომ“ გამოთიშა. პირველი შეხვედრის შედეგი იყო 1:1, საპასუხო კი ინგლისში მადრიდელებმა მოიგეს 1:0 და ამ მატჩში პორტუგალიელმა კარში ერთხელაც ვერ დაარტყა. ასეთი რამ მას ლიგაში კარიერაში მესამედ მოუვიდა: პირველად 2003 წელს „პანათინაიკოსთან“, მეორედ 2011 წელს „ბარსელონასთან“ და მესამედ ახლა. არადა, რამდენიმე დღით ადრე კრიშტიანუმ „ტოტენჰემთან“ შეხვედრაში ჰეთ-თრიკი შეასრულა და ამით აღფრთოვანებული გულშემატკივარი მისგან მორიგ გმირობას ელოდა.
როგორც მოგახსენეთ, წუხელ „ატლეტიკომ“ „მანჩესტერ იუნაიტედს“ 1:0 მოუგო. მასპინძლების კარში ბურთი რენან ლოდიმ შეაგდო, მაგრამ მანჩესტერელებმა ეს გოლი გააპროტესტეს. ისინი დარწმუნებულები იყვნენ, რომ საგოლე კომბინაციის დასაწყისში „ატლეტიკოს“ ფეხბურთელებმა ენტონი ელანგას წინააღმდეგ თამაშის წესი დაარღვიეს. ამ ეპიზოდმა განსაკუთრებით რონალდუ გააცხარა, რასაც ქვემოთ, ვიდეოზე ხედავთ. მან მსაჯს (ან თანამსაჯს) მწარე-მწარე სიტყვები უთხრა და სათვალის ტარებაც ურჩია. სავარაუდოდ, უეფა ჩანაწერს განიხილავს და „იუნაიტედის“ თავდამსხმელს დასჯის.
