ჩემპიონმა იჩემპიონა

პირველად, ათი წლის შემდეგ

ტური „გაგრა“ – „საბურთალოს“ შეხვედრით გაიხსნა. თამაში „დინამო არენაზე“ გაიმართა. ცნობისთვის, მიმდინარე სეზონის საშინაო მატჩებს „გაგრა“ სწორედ ქვეყნის მთავარ სტადიონზე ჩაატარებს.

ფავორიტებად სტუმრები მიიჩნეოდნენ, მაგრამ გაგა კირკიტაძის ბიჭებმა იყოჩაღეს. ერთადერთი გოლი ლუკა ნოზაძემ გაიტანა პირველი ტაიმის მოწურულს.

ეს გაგრელთა პირველი გამარჯვება გახლდათ ელიტაში ათწლიანი არყოფნის შემდეგ.

ტორპედო

„დინამოსთან“ პირველ ტურში შერცხვენის შემდეგ (0:4), „ტორპედოს“ მიმართ განსაკუთრებით სოციალურ ქსელებში, ბევრი უარყოფითი ითქვა. არც იყო გასაკვირი. სეზონის წინ ქუთაისელები შემადგენლობის მხრივ საკმაოდ მოძლიერდნენ. ამისდაკვალად, მათ საპრიზო ადგილების პრეტენდენტებადაც მოიაზრებენ და ასეთი უსუსური თამაში ნამდვილად არ ეკადრებოდათ.

სამაგიეროდ სულ სხვა გუნდი ვიხილეთ პარასკევს „რამაზ შენგელიაზე.“ გამართული, ჟინიანი და მოწესრიგებული. განსაკუთრებით საქართველოს ნაკრების ყოფილი ფორვარდი, ლევან მჭედლიძე უნდა გამოვარჩიოთ. ის აშკარად ძალიან ცდილობდა თავის გამოჩენას, გიორგი პაპუნაშვილის არ იყოს. ერთადერთი გოლიც მის აქტიურობას მოჰყვა, როცა მეტოქის საჯარიმოსთან ანრი ჭიჭინაძეს აართვა ბურთი და ირაკლი ბუღრიძეს გადააწოდა. ამ უკამასკნელმა კი ეფეტურად აუარა გვერდი ორ მცველს და მარჯვენა „ცხრიანი მოძებნა“.

ბუღრიძემ ყოფილ გუნდს გაუტანა. ირაკლი შარაშან სწორედ „დილას“ ფეხბურთელი გახლდათ.

ჩაბრა და ნავალა

„ჩაბრა და ნავალა“ მოემზადონო – გაისმა ბათუმელთა სათადარიგო სკამზე. მართლაც უკვე 77-ე წუთი მიმდინარეობდა, საქმე მოთავებული იყო, ბათუმელები 3:0 იგებდნენ და გია გეგუჩაძემ დაცვა გააძლიერა, მინდორზე გრიგოლ ჩაბრაძე და გიორგი ნავალოვსკი გაიყვანა. ლამაზად დაწყებული მატჩი ზღვისპირელებმა ლამაზად მიიყვანეს ბოლომდე.

ჩემპიონმა ბათუმის „დინამომ“ კი კიდევ ერთხელ დაამტკიცა, რომ ამჟამად მართლაც ქვეყნის საუკეთესო გუნდია. თბილისელ თანაკლუბელებთან ასეთი უპირატესობით გამარჯვება მართლაც შთამბეჭდავი გახლდათ. ტემპი, მაღალი პრესინგი, დისციპლინა დაცვაში – ეს დღევანდელი „ბათუმია.“ აკი შემდეგ თბილისელთა დამრიგებელმა, კახა ცხადაძემ თქვა: პირველ ნახევარში მეტოქემ ყველა ორთაბრძოლა მოგვიგო, მოედნის ცენტრში ყოველი მეორე ბურთი ბათუმელების იყოო…

ჯოვინო ფლამარიონი ვერავინ გააჩერა, ორი გოლი თავად შეაგდო და ერთიც ირაკლი ბიძინაშვილს გაატანინა. ბრაზილიელს უკვე ქართული პასპორტიც აქვს და ვინძლო საქართველოს ნაკრებშიც ვიხილოთ.

თბილისის „დინამოს“ მონდომებას ვერ დავუწუნებთ, ბოლო წუთამდე თავგამოდებით იბრძოდნენ, მაგრამ ეს ნამდვილად არ იყო მათი დღე.

სხვა

ზედიზედ მეორე მატჩი მოიგო „თელავმა“ და სატურნირო ცხრილში მეორე ადგილზე დადგა. კახელებმა „სიონს“ გიორგი კვერნაძისა და ლაშა ქოჩლაძის გოლებით სძლიეს. ახლა თელაველები ბათუმელებთან ერთად უდანაკორგონი არიან და არც გოლი გაუშვიათ.

ზედიზედ მეორედ დამარხდა „ლოკომოტივი,“ ამჯერად „სამგურალთან“ – 1:3 და „სიონთან“ ერთად ჯერჯერობით უქულოდაა.

გაგრა 1:0 საბურთალო

1:0 ნოზაძე (45+1)

ტორპედო 1:0 დილა

1:0 ბუღრიძე (5)

ბათუმი 3:0 დინამო

1:0, 2:0 ფლამარიონი (11, 24), 3:0 ბიძინაშვილი (63)

სიონი 0:2 თელავი

0:1 კვერნაძე (47), 0:2 ქოჩლაძე (68)

სამგურალი 3:1 ლოკომოტივი

0:1 შეყილაძე (38), 1:1 რუხაძე (73 პენ), 2:1 ჩიხლაძე (78), 3:1 რუხაძე (86)

მეგოლეები: ფლამარიონი (ბათუმი) – 3, ვლადიმერ მამუჩაშვილი, ირაკლი ბიძინაშვილი (ორივე – ბათუმი), ირაკლი რუხაძე (სამგურალი) – 2