გერმანული ფეხბურთის ლეგენდამ ლოთარ მათეუსმა თქვა, რომ ნიკლას ზულემ „ნიუკასლ იუნაიტედში“ გადასვლაზე უარი თქვა. ცენტრალურმა მცველმა, რომელსაც სეზონის ბოლოს „ბაიერნთან“ თანამშრომლობის ვადა გაუდის, „დორტმუნდთან“ წინასწარ კონტრაქტს მოაწერა ხელი. არადა, მას შეეძლო არაბული ფულით გამდიდრებული „კაჭკაჭებისგან“ ორჯერ მეტი გასამრჯელო მიეღო, ვიდრე დორტმუნდში გადაუხდიან.
ზულეს გადაბირებით „ჩელსი“ და „ბარსელონაც“ იყვნენ დაინტერესებულები.
რამდენადაც ცნობილია „ბაიერნიც“ ცდილობდა ფეხბურთელთან ახალი ხელშეკრულების გაფორმებას — მიუნხენელები ხელფასს წელიწადში 10 მილიონ ევრომდე უზრდიდნენ, მაგრამ უარი მიიღეს.
თებერვლის დასაწყისში „დორტმუნდმა“ განაცხადა, რომ ზულე 2022-23 წლების სეზონიდან „ვესტფალენშტადიონზე“ ითამაშებს. ამბობენ, რომ მხარეები ოთხწლიან თანამშრომლობაზე შეთანხმდნენ.
ნიკლას ზულე „ბაიერნმა“ „ჰოფენჰაიმიდან“ 2017 წელს 20 მილიონ ევროდ შეიძინა.
მათეუსი ამბობს, რომ 26 წლის ფეხბურთელი „დორტმუნდში“ ფულის გამო არ გადადის. მას სპორტული გამოწვევა აინტერესებს. ზულესთვის მთავარი ფული რომ ყოფილიყო, „ნიუკასლში“ წავიდოდაო, თქვა 60 წლის ვეტერანმა.
მათეუსი: „მას „ნიუკასლ იუნაიტედი“ სთავაზობდა კონტრაქტს, „დორტმუნდზე“ ორჯერ მეტ გასამრჯელოს ჰპირდებოდა, მაგრამ ზულეს სპორტული გამოწვევა აინტერესებს. ბოლოხანს ის გრძნობდა, რომ „ბაიერნში“ აღარ აფასებდნენ. ბოლო წლებში მას ბავარიაში ზედმეტი წონის გამო ხშირად ესხმოდნენ თავს და ერთხელ არავინ გამოქომაგებია. არადა, ნიკლასმა მათთან ერთად ჩემპიონთა ლიგა მოიგო, დიდებული თამაშები ჩაატარა და კლუბისთვის მსხვერპლი გაიღო. ჯანმრთელობაც კი არ დაუზოგავს.
სამწუხაროდ, „ბაიერნი“ ვერაფრით გაძღა, კიდევ უფრო მეტს ითხოვდა. კარგად ვიცი რატომაც უთხრა ზულემ თავის აგენტებს, მორჩა, ამ კლუბთან მოლაპარაკებებს აღარ გავაგრძელებთო“.
ნიკლას ზულემ „ბაიერნის“ შემადგენლობაში 162 შეხვედრა ჩაატარა. ის ოთხჯერ იყო ბუნდესლიგის ჩემპიონი, მოიგო ჩემპიონთა ლიგა, ორჯერ გახდა გერმანიის თასისა და ერთხელ სუპერთასის მფლობელი.
