შაბათს პრემიერლიგამ მორიგი სიგიჟე მოაწყო. „მანჩესტერ სიტისა“ და „ტოტენჰემ ჰოთსპურის“ შეხვედრაში მე-5 წამატებული წუთი მიდიოდა, როდესაც დეიან კულუშევსკიმ მარჯვენა ფრთაზე, საჯარიმოსთან, ბურთი ფეხზე მორიგო და ჩააწოდა, სადაც ის ჰარი კეინი, რომლის ყიდვასაც გასულ ზაფხულში „სიტი“ ოთხჯერ ცდილობდა ახტა და თავით „სფურზის“ გამარჯვების გოლი ჩაჭედა — 3:2.
კეინს კაილი უოქერი მეურვეობდა, მაგრამ ფორვარდმა, რომელზეც ამბობდნენ, რომ მიმდინარე სეზონში ადრინდელივით ვეღარ თამაშობს, ამ ეპიზოდში, ისევე როგორც მთელი შეხვედრის განმავლობაში საუცხოოდ იმოქმედა. არადა, ამ გუნდების წინა შეხვედრაში, რომელიც ჩემპიონატის პირველ ტურში გაიმართა, კეინი მოედანზე არ იყო, ლონდონელი ფანები კი მასზე ბრაზობდნენ, რადგან კარგად იცოდნენ, რომ მათი კერპი სწორედ პეპ გვარდიოლასთან გარბოდა.
როდესაც პრემიერლიგის მიმდინარე სეზონი დასრულდება და მტვერი დაჯდება, არ არის გამორიცხული გამოჩნდეს, რომ ჰარი კეინის მიერ გვარდიოლას გუნდის კარში გატანილმა პირველმა გოლებმა საბოლოო შედეგებზე გავლენა იქონია.
დიახ, გოლებმა, რადგან კეინმა „სიტის“ ორი გაუტანა.
დიახ, პირველმა(!) გოლებმა, რადგან რაც გვარდიოლა „ქალაქელების“ თავკაცია, ინგლისის ნაკრების კაპიტანმა მანჩესტერელების წინააღმდეგ ათჯერ ითამაშა და მხოლოდ გუშინ, მეათე შეხვედრაში მიაღწია მიზანს.
მაგრამ, „სიტისა“ და „ტოტენჰემის“ შეხვედრის სიგიჟე მხოლოდ ის არ გახლდათ, რომ „სფურზმა“ ლიდერს შინ აჯობა და გამარჯვების გოლი 90+5 წუთზე შეაგდო. სიგიჟის დიდი ნაწილი იყო ისიც, რომ „სიტი“ 1:2-ს აგებდა და ანგარიში 90+2 წუთზე გაქვითა. ეს მოხდა პენალტით, რომელიც საჯარიმოში ხელით თამაშის გამო დაინიშნა. და ვინ წარმოიდგენდა, რომ მსაჯის წამატებულ მე-2 წუთზე გატანილი გოლი ბოლო არ იქნებოდა.
თანმიმდევრობით თუ მოვყვებით გოლები ასე გავიდა: „ტოტენჰემმა“ ანგარიში მე-4 წუთზე გახსნა. გოლი კულუშევსკიმ შეაგდო. ეს იყო „იუვენტუსიდან“ ლონდონში იჯარით გადასული შვედის დებიუტი და პირველი დარტყმა რომელიც მან „ტოტენჰემის“ მაისურით შეასრულა. 33-ე წუთზე ილქაი გუინდოგანმა დახვეწილი დარტყმით გაქვითა ანგარიში.
59-ე და 73-ე წუთებზე კეინმა გამოიჩინა თავი, მაგრამ მეორე ეპიზოდში საქმეში VAR ჩაერია, არბიტრს ჩანაწერის მონიტორზე ნახვა ურჩია და გოლი ოფსაიდის გამო არ ჩაითვალა.
ბოლოს კი იყო მსაჯის წამატებული გიჟური წუთები, რომელთა შესახებ ზემოთ უკვე მოგახსენეთ.
ახლა, 26 თამაშიდან 63 ქულით ლიდერობას „მანჩესტერ სიტი“ ინარჩუნებს. მას მოსდევს „ლივერპული“, რომელსაც 6 ქულით და თამაშით ნაკლები აქვს.
„ტოტენჰემი“ 23 თამაშიდან 39 ქულით მე-7 ადგილზეა.
