ვაჟა კაპანაძემ ბურთი რაქიდან აიტაცა და სტუმართა ჩათვლის მოედანზე დაამიწა. ეს მოხდა „ბრესანისა“ და „აჟენის“ მატჩის 62-ე წუთზე და ქართველი ბურჯის ამ ლელომ მისი გუნდი ისე დააწინაურა, რომ მეტოქე ვეღარ დაეწია.
27 წლის კაპანაძემ პრო დ2-ში თავისი პირველი ლელო გაიტანა, მისმა „ბრესანმა“ კი უმნიშვნელოვანესი გამარჯვება იზეიმა – 37:32. ვაჟა თამაშში 46-ე წუთზე ჩაერთო, ხოლო აჟენელებს 65-ეზე ბორჯღალოსანი ჯაბა ბრეგვაძე შეუერთდა და თავის გუნდს სანუგეშო ბონუსის მოპოვებაში დაეხმარა.
„კოლომიემ“ „ნევერს“ შინ 26:21 მოუგო. მასპინძელთა სასტარტოში ბექა შეყლაშვილი იყო, რომელმაც პირველი ტაიმი ითამაშა, ხოლო ნევერელებმა მატჩი ორი ქართველი ბურჯით დაიწყეს – თორნიკე მატარაძემ 52-ე წუთამდე ითამაშა, გია ხარაიშვილმა – 62-მდე.
„ბეზიემ“ მოულოდნელად დამაჯერებელი გამარჯვება ტურნირის ერთ-ერთ ფავორიტ „ბაიონთან“ მოიპოვა – 35:14, არადა 28-ე წუთამდე 0:14 აგებდნენ. გამარჯვებულთა შორის 53-ე წუთზე გიორგი ახალაძე გამოჩნდა, ხოლო სტუმართა სასტარტოში კოტე მიქაუტაძე იყო, ვინც 71-ე წუთზე შეცვალეს, თუმცა 54-ზე ბორჯღალოსანმა მეორეხაზელმა ყვითელი ბარათის გამო 10 წუთი სინბინში გაატარა.
18 წლის ირაკლი აფციაურმა ზედიზედ მეორედ ითამაშა „გრენობლის“ შემადგენლობაში და ალპელების უმნიშვნელოვანეს გამარჯვებაში 31-წუთიანი წვლილი შეიტანა. საქართველოს ასაკობრივი ნაკრების ერთ-ერთი ლიდერი „ორიაკთან“ საშინაო მატჩში უკვე 29-ე წუთზე ჩაერთო და მე-60 წუთამდე საკმაოდ კარგადაც ითამაშა. ორიაკელთა სასტარტოში ტრადიციულად იყო გიორგი ქართველიშვილი, ვინც პიველი ტაიმის შემდეგ დაასვენეს და მინდორზე კვლავ 78-ე წუთზე უხმეს. ბორჯღალოსანი გიორგი ცუცქირიძეც სასტარტოში იყო, ასევე პირველი ტაიმის შემდეგ გადაინაცვლა მარქაფაში, მაგრამ თამაშში 64-ეზე დაბრუნდა და გუნდს ბონუსის მოპოვებაში დაეხმარა – 27:23.
„ორიაკის“ მარქაფიდან თამაშში 61-ე წუთზე ბორჯღალოსანი ლუკა ნიორაძე ჩაერთო, 41-ეზე – ასევე ბორჯალოსანი გიორგი ჯავახია, ხოლო გიორგი გოგოლაძემ ჯერ 28-ედან ტაიმის ბოლომდე ითამაშა, შემდეგ კი 62-ედან საფინალო სასტვენამდე.
კარლენ ასიეშვილის „რუანმა“ ნარბონში ბონუსი მიიღო – ლიგის უპირობო აუტსაიდერთან 16:19 დამარცხდა. ვეტერანმა ბურჯმა პირველიდან 47-ე წუთამდე ითამაშა.
დაბოლოს, ტურის ცენტრალურ მატჩზეც: „მონ-დე-მარსანმა“ ლიდერ „ოიონაქსს“ 27:20 მოუგო და ლიდერობაც ჩამოართვა. გამარჯვებულთა შორის ბოლო 18 წუთი ლაშა მაჭარაშვილმა ითამაშა, ხოლო სტუმართა რიგებში 49-ეზე ვეტერანი ირაკლი მირცხულავა გამოჩნდა, ვინც თამაშის დასრულებამდე 5 წუთით ადრე დაშავდა და მოედანი დატოვა.
