ბრაზილიელი ადრიანოს დაბადების დღეა… 40 წლის გახდა. ერთ-ერთი თვალსაჩინო მაგალითი, როგორ აურია ფეხბურთელმა თავისი კარიერა. ყოფაქცევაში ორიანი — ადრე ხომ იყო ასეთი რამ? ზუსტად ესადაგება ადრიანოს, რომელმაც კარიერა ფაქტიურად 24 წლის ასაკში დაასრულა.
არა, კიდევ დიდხანს ითვლებოდა მოქმედ ფეხბურთელად, მაგრამ 24 წლის მერე სულ რეგრესი ჰქონდა. ცოტა ხანს გამოანათა კიდევ ერთხელ „ფლამენგოში“, მაგრამ ისევ ჩაეშვა. ურეჟიმობა, გასუქება, კაზინოები, კრიმინალებთან და ნარკოკარტელებთან კავშირი — ადრიანო სხვა ცხოვრებაში გადაეშვა. რაც კარიერაში ფული ჰქონდა ნაშოვნი, ლამის ყველაფერი წყალს გაატანა და რიო-დე-ჟანეიროში დაბრუნდა, ფაველაში, სადაც ბავშვობა გაატარა.
საბედნიეროდ, ისევ შეიცვალა. დაახლოებით ორი წელია, საქველმოქმედო აქციებში და სპორტულ ღონისძიებებში მონაწილეობს, ბრაზილიაში adidas-ს უწევს რეკლამას, ოჯახურ ცხოვრებას დაუბრუნდა.
