„ბარსელონას“ თავკაცი ჩავი იძულებული გახდა რონალდ არაუხოს მიერ „ესპანიოლის“ ფეხბურთელებისათვის მიყენებული შეურაცხყოფის გამო ბოდიში მოეხადა. ნერვიულ დერბიში „ესპანიოლი“ 2:1-ს იგებდა. ლუკ დე იონგმა მხოლოდ 90+6 წუთზე შეძლო ქულის გადარჩენა.
შეხვედრის ბოლო წამები იმდენად დაძაბული გამოდგა, რომ მოედნიდან მანუელ მორლანესი, ნიკო მელამედი და ჟერარდ პიკე გააძევეს. აი, არაუხო კი მართალია შესვენების დროს ტრავმის გამო შეცვალეს, მაგრამ გიჟურ ბოლო წუთებში სათადარიგოთა სკამიდან მოახერხა მელამედთან დაპირისპირება. ის მეტოქეს ორიანს აჩვენებდა — მეორე დივიზიონში გავარდებითო.
„მე ეს არ დამინახავს, — თქვა ჩავიმ, რომელიც ამ ეპიზოდში არაუხოსკენ მართლაც ზურგით იდგა, — ჩვენ მეტოქეებს, მსაჯებსა და მოწინააღმდეგე გუნდის ქომაგებს პატივს უნდა ვცემდეთ. მართალია, ვითარება მოედანზე ხანდახან ძალიან იძაბება, მაგრამ ეს პატივისცემა არასდროს უნდა დავკარგოთ. თუ ასეთი რამ მოხდა, ბოდიშს მე ვიხდი“.
არაუხოს შეძახილებმა „ესპანიოლის“ ფეხბურთელები მაინცდამაინც ვერ გამოიყვანეს წყობიდან. თავდამსხმელმა სერხი დარდერმა, რომელმაც ამ დღეს მასპინძლების პირველი გოლი გაიტანა და პედრის გახსნილი ანგარიში გაქვითა, თქვა: „არაუხო ორიოდ წლის წინ თავად თამაშობდა სეგუნდა B-ში. ის ჯოჯოხეთურად ძლიერი ცენტრალური მცველია, მაგრამ ასეთი ქცევა არ უხდება“.
პირველი ტაიმი 1:1 დამთავრდა. 64-ე წუთზე რაულ დე ტომასმა „ესპანიოლი“ დააწინაურა, მაგრამ ბოლოს, როგორც მოგახსენეთ, შეხვედრას წერტილი ჰოლანდიელმა ლუკ დე იონგმა დაუსვა.
