სტივენ ჯერარდი „ასტონ ვილაში“ ეტყობა მართლაც რევოლუციას აპირებს. ფილიპე კოუტინიო ხომ გადაიყვანა იჯარით „ბარსელონადან“ და ბრაზილიელმაც პირველივე შეხვედრაში გაუმართლა, „მანჩესტერ იუნაიტედთან“ სადებიუტო მატჩში (2:2), გოლით და საგოლე გადაცემით გამოირჩა.
კოუტინიოს გარდა ბირმინგემელებმა კიდევ სამი მოთამაშე – შვედი მეკარე რობინ ულსენი (ასევე იჯარით), მარცხენა მცველი, ლუკ დინი და საკუთარი აკადემიიდან ჭაბუკი კერ სმითი დაიმატეს.
საუბარია მადრიდის „ატლეტიკოდან“ ურუგვაელი ლუის სუარესის გადაბირებაზეც, რომელიც თავის დროზე, კოუტინიოსი არ იყოს, სტივი ჯის თანაგუნდელი იყო „ლივერპულში.“
ბოლო ინფორმაციით კი „ასტონ ვილას“ „არსენალის“ თავდამსხმელის, ედი ნკეიტას შეძენაც სურს.
ნკეიტას კონტრაქტს „მეთოფეებთან“ ვადა მომავალ ზაფხულს ეწურება. თუმცა მხარეებმა მის გაგრძელებაზე ვერ მოილაპარაკეს. ამ სიტუაციით „ასტონ ვილას“ უნდა ისარგებლოს და 22 წლის ინგლისელი იანვარში შეღავათიან ფასში შეიძინოს.
მიმდინარე სეზონში ნკეიტამ „არსენალის“ მაისურით მხოლოდ სამი მატჩი ჩაატარა და სათამაშო დროის ნაკლებობას უჩივის. ასე რომ, თავადაც არ იქნება წინააღმდეგი კარიერა სხვა კლუბში გააგრძელოს.
ჯერარდს ეტყობა დიდი გეგმები აქვს, თუმცა უნდა იჩქაროს, ზამთრის სატრანსფერო ფანჯრის დახურვამდე ხომ 11 დღე დარჩა (ფანჯარა 31 იანვარს, ადგილობრივი დროით 23 საათსა და 59 წუთზე დაიხურება).
