„მანჩესტერ იუნაიტედის” ვეტერანმა პოლ სქოულზმა თავის საყვარელ კლუბს მოუწოდა ზაფხულზე მაინც გადაიბიროს ანტონიო კონტე. მისი აზრით 52 წლის იტალიელი ბოლოს და ბოლოს დაამთავრებს არეულობას „ოლდ ტრეფორდზე”. ლეგენდარული „იუნაიტედის” ნახევარმცველი დარწმუნებულია, რომ დროებითმა მწვრთნელმა რალფ რანგნიკმა გუნდში ახალი არეულობა შეიტანა.
მანჩესტერელთა შეფებმა თავის დროზე კონტეს სამსახურში აყვანა არ ისურვეს. მათ ჯერ კიდევ ოლე გუნარ სულშერის ეიმედებოდათ. არადა, კონტეს ხელმძღვანელობით „იუვენტუსი”, „ჩელსი” და „ინტერი” ხუთჯერ გახდნენ სერია A-ს და პრემიერლიგის ჩემპიონები.
ნოემბერში ანტონიო კონტე „ტოტენჰემს” ჩაუდგა სათავეში. ბედის ირონიით, ამ ამბიდან სამ კვირაში „მანჩესტერ იუნაიტედმა” სულშერი თანამდებობიდან გაათავისუფლა.
სქოულზმა თქვა: „ზოგი ამბობს, რომ ის „იუნაიტედის” შესაფერისი მწვრთნელი არ არის, მაგრამ ხომ ხედავთ, როგორ ათამაშებს „ტოტენჰემს”, გუნდს, რომელიც შემადგენლობით „მანჩესტერთან” ახლოსაც ვერ მოვა. ვფიქრობ, „სფურზი” სერიოზულად იბრძოლებს ოთხეულში შესვლისთვის. „იუნაიტედმა” კონტეს მწვრთნელად დანიშვნის ჩინებული მომენტი გაუშვა ხელიდან, თუმცა ვინ იცის, იქნებ მისი „ოლდ ტრეფორდზე” გადმოყვანა ჯერ კიდევ შეიძლება.
ცხადია, „ტოტენჰემის” ფანებს ჩემი ეს სიტყვები არ ესიამოვნებათ, მაგრამ კონტე თავისი ფეხბურთელებით უკმაყოფილოა და კლუბის პატრონებს ახალი ხალხის ყიდვას სთხოვს.
დარწმუნებული ვარ, კონტე „მანჩესტერ იუნაიტედისგან” კარგ გუნდს გააკეთებდა, მაგრამ საკითხს მეორე მხრიდანაც შეიძლება შევხედოთ: თავად მოუნდება აქ გადმოსვლა? დღეს „ოლდ ტრეფორდზე” დიდი არეულობაა, რომელშიც ჩართულია მთელი სტაფი, გუნდი და მწვრთნელი. ასეთ შხამიან გარემოსთან ადამიანს საქმის დაჭერა შეიძლება არც მოუნდეს”.
რალფ რანგნიკის ხელმძღვანელობით „მანჩესტერ იუნაიტედმა” პირველი 7 შეხვედრიდან მხოლოდ ერთი წააგო, მაგრამ უხარისხო ფეხბურთს თამაშობს.
სქოულზი: „ჩვენ მწვრთნელად მოვიყვანეთ კაცი, რომელსაც ევროპაში იცნობენ. მას აქებენ, განსაკუთრებით იურგენ კლოპი და თომას ტუხელი, მაგრამ რანგნიკს როგორც მწვრთნელს დიდი წარმატებებისთვის არ მიუღწევია. მისი საუკეთესო შედეგი რომელიღაც გუნდის გერმანიის ბუნდესლიგაში აღზევება და „შალკესთან” თითო ოროლა წარმატებაა. და ის უცებ მსოფლიოს უდიდესი კლუბის თავკაცად დანიშნეს. ეს იმდენად გაუგებარი ნაბიჯი იყო, რომ ჯერაც თავბრუ მეხვევა.
ჩვენთან უნდა მუშაობდეს მსოფლიოს ხუთი ტოპ-მწვრთნელიდან ერთ-ერთი. სამი საუკეთესო ტუხელი, პეპ გვარდიოლა და კლოპი არიან, მაგრამ ამ ეტაპზე მათი მიწვევა გამორიცხულია; თუმცა არსებობს კონტე”.
შემდეგ სიტყვამ „პარი სენ ჟერმენის” თავკაცი მაურისიო პოჩეტინო მოიტანა.
„პოჩეტინო საუცხოო მწვრთნელია. მე ძალიან მომწონდა როგორ მუშაობდა ის „საუთჰემპტონსა” და „ტოტენჰემში”. მიმდინარე სეზონში მან დაამტკიცა, რომ ელიტური მწვრთნელიც არის, თუმცა ჯერ კიდევ ბევრი რამის დამტკიცება სჭირდება. და მაინც, მას უფრო შეუძლია „მანჩესტერ იუნაიტედში” წარმატების მიღწევა, ვიდრე სხვას”.
