რალფ რანგნიკი „მანჩესტერ იუნაიტედის“ ფეხბურთელთა ურთიერთობებში გაიხლართა. „სანმა“ შეიტყო, რომ ცუდი ფორმის მიუხედავად რანგნიკი ერთ ჯგუფს უპირატესობას ანიჭებს, რითაც მეორეს აღიზიანებს.
„ვულვერჰემპტონთან“ 0:1 წაგების შემდეგ ლუკ შოუმ თავი ვეღარ შეიკავა და თანაგუნდელები საჯაროდ გააკრიტიკა; თავდადება, ერთსულოვნება და გამარჯვების წყურვილი დაუწუნა მათ.
„მანჩესტერ იუნაიტედის“ წყარომ, რომელიც კლუბში ტრიალებს და ყველაფრის მოწმეა (ვინ იცის ერთ-ერთი ფეხბურთელიც იყოს), თქვა, რომ რასაც დღეს ვხედავთ დიდი გუნდის ნანგრევებიღაა. ის შიშობს, რომ რანგნიკის მწვრთნელობის პერიოდი კატასტროფული იქნება.
„გუნდი ჯგუფებად არის დაყოფილი. ერთი ჯგუფი მეორეს ზემოდან უყურებს, აგრძნობინებს, რომ ის დაბალ დონეზეა, არადა პრობლემის წინაშე მთელი „მანჩესტერ იუნაიტედი“ დგას. გუნდი დემორალიზებულია.
გულშემატკივარი ალბათ ფიქრობს, რომ ფეხბურთელები რანგნიკის გეგმების განსახორციელებლად მზად არ არიან. ეს დიდი ტყუილია. გუნდში ზოგადი არეულობაა. ზოგმა მართლა დაკარგა თამაშის წყურვილი. ბევრი ფიქრობს, რომ რანგნიკს ფავორიტები ჰყავს და მიუხედავად იმისა, რომ ეს ფავორიტები ცუდ ფორმაში არიან, მწვრთნელი მათ მაინც ათამაშებს. მოკლედ, დიდი აურზაურია“. — თქვა თვითმხილველმა.
63 წლის რალფ რანგნიკი „მანჩესტერ იუნაიტედის“ დროებითი მწვრთნელია. მას სეზონის ბოლომდე აქვს კონტრაქტი. ტელეკამერებს მიღმა გერმანელს იცნობენ როგორც უკარება და საკუთარ თავში ზედმეტად დარწმუნებულ ადამიანს. „იუნაიტედის“ ფეხბურთელები კერძო საუბრებში არ მალავენ, რომ კლუბის ხელმძღვანელობას „ტოტენჰემ ჰოთსპურისთვის“ უნდა დაესწრო და ანტონიო კონტე მიეყვანა. ისინი აგრეთვე იმედოვნებენ, რომ ზაფხულში „ოლდ ტრეფორდზე“ „პარი სენ ჟერმენის“ დღევანდელი ბოსი, არგენტინელი მაურისიო პოჩეტინო მივა.
რანგნიკის ხელმძღვანელობით „მანჩესტერ იუნაიტედმა“ სამი თამაში მოიგო, ორი ფრედ ითამაშა და ერთი წააგო. „ვულვზთან“ დამარცხება გახლდათ პირველი მას მერე, რაც გუნდი ოლე გუნარ სულშერმა დატოვა. თუმცა, სამართლიანობა მოითხოვს აღინიშნოს, რომ „ნორვიჩთან“ 1:0 გამარჯვებასა და „ნიუკასლთან“ 1:1-ში იღბლის ხელი ერია.
ეჭვქვეშ დგას რანგნიკის საყვარელი განლაგების 4-2-2-2-ის გონივრულობაც. ეს განსაკუთრებით „ვულვზთან“ მარცხის დროს გამოჩნდა, როდესაც საკმარისი იყო „იუნაიტედის“ განაპირა მცველები შეტევაში წასულიყვნენ, რომ გუნდის დაცვაში ბზარი ჩნდებოდა. „ვულვერჰემპტონმა“ სწორედ ამით ისარგებლა და ტაქტიკურად მოიგო.
არის კიდევ ერთი საკითხი, რომელსაც რანგნიკი როგორც ჩანს ვერაფერს მოუხერხებს: სეზონის ბოლოს თავისუფალი აგენტები ხდებიან პოლ პოგბა, ედინსონ კავანი, ჯესი ლინგარდი და ხუან მატა. როგორ უნდა მოიქცეს კლუბი? ეს ფეხბურთელები დარჩენაზე უნდა დაიყოლიოს? თუ არა და ვინ უნდა შეცვალოს ისინი? ეს ნამდვილად არ არის იმ კაცის გადასაწყვეტი, რომელმაც თავად არ იცის რჩება თუ ჩამოთვლილი მოთამაშეებთან ერთად მიდის.
„იუნაიტედი“ პრემიერლიგის ცხრილში მე-7 ადგილზეა. ის მეოთხე ადგილს 4 ქულით ჩამორჩება. ნაახალწლევს ასე დაბლა გუნდი მხოლოდ 2013-14 წლების სეზონში იყო, როდესაც სერ ალექს ფერგიუსონი წავიდა და მანჩესტერში ახალი ეპოქა დაიწყო.
