„ბარსელონამ“ „მალიორკას“ ლუკ დე იონგის გოლისა და მარკ-ანდრე ტერ შტეგენის რეაქციის წყალობით მოუგო, 1:0. Covid 19-ით შემუსრილმა კატალონიურმა კლუბმა ცხრილში სამი ქულა შეიმატა. ახლა ის 19 თამაშის შემდეგ 31 ქულით მე-5 ადგილზეა. „ბარსა“ ლიდერ „რეალს“ 15 ქულით ჩამორჩება, მაგრამ მისთვის ჯერჯერობით უფრო მთავარი ის არის, რომ მეოთხე ადგილამდე ერთი ქულაღა აკლია.
შეხვედრის ერთადერთი გოლი დე იონგმა პირველი ტაიმის მიწურულს, 44-ე წუთზე გაიტანა. რაც შეეხება ტერ შტეგენის საოცარ თამაშს, როდესაც მან ხუამე კოსტას დარტყმული მოიგერია და მალიორკელებს ორი ქულის წართმევის შესაძლებლობა არ მისცა, ეს უკვე მატჩის ბოლოს იყო.
კორონავირუსის, ტრავმებისა და დისკვალიფიკაციის გამო ამ შეხვედრაში ჩავის 15 ფეხბურთელი აკლდა. „ბარსას“ მწვრთნელი თამაშის გადადებას ითხოვდა, მაგრამ ლა ლიგამ ნება არ დართო — კანონში წერია, რომ თუ კლუბს პირველი გუნდის ხუთი მოთამაშე მაინც ჰყავს ჯანმრთელად, მატჩი უნდა გაიმართოს. „ბარსელონას“ ორი მეკარის ჩათვლით პირველი გუნდის 11 ფეხბურთელი ჰყავდა მწყობრში და ერთმა მათგანმა, დე იონგმა, მატჩის გმირობაც იკისრა — გოლამდე მაკრატელა დარტყმით ძელსაც გაარტყა ბურთი.
პირველი ტაიმი „ბარსელონასი“ იყო, მეორეში კი „მალიორკა“ მოყოჩაღდა, მაგრამ სტუმრების დაცვასა და გერმანელ მეკარეს ვერ აჯობა.
