პრემიერლიგაში ჯერ სეზონის შუაა, მაგრამ ინგლისურ მედიაში უკვე მეტისმეტად თამამ განცხადებებს აკეთებენ. როგორ მოგწონთ მაგალითად წინადადება: „მანჩესტერ სიტის“ ახალ წლამდე მაინც მოეთმინა და ჩემპიონი მერე გამხდარიყო. ვითომ მართლა ასეა საქმე?
„ქალაქელებმა“ „ბრენტფორდს“ სტუმრად 1:0 მოუგეს. ეს მათი ზედიზედ მეათე გამარჯვება იყო, მაგრამ როგორც მიმომხილველები წერენ, ამაზე მნიშვნელოვანი 24 საათით ადრე „ლესტერთან“ „ლივერპულის“ დამარცხება იყო.
ახლა პეპ გვარდიოლას გუნდი ცხრილში 8 ქულით ლიდერობს. წუხელ მას „ჩელსიმაც“ სცა პატივი და „ბრაიტონთან“ ფრედ, 1:1 ითამაშა. ახლა, მართალია 2022 წლის კალენდარი ბევრ საინტერესო მატჩს გვპირდება, მაგრამ ისევ ინგლისურ პრესას თუ დავესესხებით, პრემიერლიგის პირველობისთვის ბრძოლაში განსაკუთრებული დაძაბულობა ალბათ აღარ იქნება.
არადა, „ბრენტფორდთან“ შეხვედრაში „სიტიმ“ ის ფეხბურთი, რომლითაც გულშემატკივარს ასე აღაფრთოვანებს, ვერ ითამაშა. გვარდიოლას იდეა, რომ ბურთი შეხვედრის განმავლობაში ძირითადად მისმა გუნდმა აგოროს განხორციელდა, მაგრამ „სიტის“ შეტევებს სიმწვავე აკლდა. თამაში 1:0 დამთავრდა. გოლი მე-16 წუთზე ფილ ფოდენმა გაიტანა.
როგორც ამბობენ, ახლა გვარდიოლა თავის გუნდს რამდენიმე დღით ლონდონში დატოვებს, სადაც შაბათს „არსენალს“ უნდა ეთამაშოს.
ინგლისურ პრესაში ხუმრობენ, „სიტის“ თავს ყველაფერი კარგად იქნება თუკი ამ საახალწლო დღეებში ფოდენი და ჯეკ გრილიში დედაქალაქურ ცდუნებებს გაუძლებენ და ღამ-ღამობით სოჰოში არ გავარდებიანო.
„ბრენტფორდისა“ და „სიტის“ შეხვედრის საუკეთესო მომენტებს ქვემოთ, ვიდეოში იხილავთ.
