დუბაიში გამართულ „გლობ სოკერ ევარდსის“ დაჯილდოებაზე პოლონეთის ნაკრებისა და „ბაიერნის“ თავდამსხმელმა რობერტ ლევანდოვსკიმ მორიგი ჯილდო მიიღო — ის 2020 წლის მსოფლიოს საუკეთესო ფეხბურთელად დაასახელეს.
2021 წლის მსოფლიოს საუკეთესო ფეხბურთელის ჯილდო კი ბურჯ ხალიფაში მდებარე „არმანი ოტელში“ გამართულ ცერემონიალზე საფრანგეთის ნაკრებისა და „პარი სენ ჟერმენის“ თავდამსხმელს კილიან მბაპეს გადასცეს.
ლევანდოვსკიმ არაბთა გაერთიანებულ საემიროებში კიდევ ერთი პრიზი მიიღო — ახალდაარსებული ჯილდო, რომელიც დიეგო მარადონას სახელს ატარებს და რომელიც ამიერიდან კალენდარული წლის საუკეთესო ბომბარდირს გადაეცემა. მისი სპონსორია ტიკტოკი.
რობერტ ლევანდოვსკი ცერემონიალს მეუღლესთან ანასთან ერთად ესწრებოდა.
მეუღლეებთან ერთად იყვნენ აგრეთვე „ლივერპულის“ ლეგენდა იან რაში და ლეგენდარული იტალიელი მწვრთნელი ფაბიო კაპელო. საღამოს ესწრებოდნენ იტალიის ნაკრების მწვრთნელი რობერტო მანჩინი, პატრიკ კლაივერტი, და სხვები.
წლის უძლიერესი კლუბის ჯილდო გადასცეს „ჩელსის“.
ლეონარდო ბონუჩი წლის საუკეთესო მცველი გახდა, ხოლო მანჩინი წლის საუკეთესი მწვრთნელი.
კრიშტიანუ რონალდუს ჯილდო — „ყველა დროის საუკეთესო ბომბარდირი“ — მისმა აგენტმა ჟორჟი მენდეშმა ჩაიბარა და რაკი აგენტი ვახსენეთ, აქვე დავძენთ, რომ წლის საუკეთესო „საფეხბურთო საქმოსნის“ ჯილდო ფედერიკო პასტორელოს გადაეცა.
ქალთა ფეხბურთის საუკეთესო კლუბად დაასახელეს „ბარსელონა“.
ჯილდო გამორჩეული კარიერისთვის მიიღო ბრაზილიელმა ლეგენდამ რონალდინიომ.
