ლიონელ მესიმ ოქროს ბურთი იმდენჯერ მოიგო, რამდენჯერაც ზიდანმა, ეუსებიომ, გერდ მიულერმა, ბაჯომ, ბესტმა, რონალდინიომ და ბობი ჩარლტონმა ერთად აღებულმა.
სტატისტიკას უყვარს ასეთი დატოლებები, თუმცა სერიოზულად აღსაქმელად ასეთი დატოლებები არ ღირს.
მეშვიდე ოქროს ბურთის ჩაბარებისას, მესიმ რობერტ ლევანდოვსკის გახედა და საჯაროდ უთხრა, რომ შარშან დანამდვილებით მას ერგებოდა ეს ჯილდო. ამით არგენტინელმა ორი კურდღელი მოიგო – პანდემიის გამო გაუთამაშებელი ჯილდო მეტოქეს დაუთმო და თან მიანიშნა, რომ წლევანდელი ნაღდი ოქროს ბურთის ღირსეულ მფლობელი თავად იყო.
ძნელად დასაჯერებელია, რომ პოლონელს მესის ეს სიტყვები გულზე მალამოდ მოსცხებოდა.
რა გააკეთა წელს მესიმ? ბარსელონასთან ერთად ჩემპიონთა ლიგის 1/8 ფინალში გავიდა, რაც დადებით შედეგად ვერაფრით ჩაითვლება. ასევე წარუმატებლობაა მესამე ადგილი ლა ლიგაში. თუმცა მესიმ ესპანეთის თასი მოიპოვა და ლა ლიგის საუკეთესო ბომბარდირიც გახდა 30 გოლით. ოქროს ბურთი კი, ალბათ პირველ რიგში სანაკრებო მიღწევის გამო გადაეცა – მესი არგენტინას კოპა ამერიკის გმოგებაში დაეხმარა.
ახალ სეზონში, უკვე პსჟ-ის მაისურით, მესიმ 11 მატჩში 4-ჯერ გაიტანა და სამი ბურთიც სხვებს გაატანინა.
საბოლოოდ, ადგილები ასე განაწილდა: მესი, ლევანდოვსკი, ჟორჟინიო.
როგორც შენიშნავდით, რონალდუ სამეულში ვერ მოხვდა, რაც უკანასკნელად 2010 წელს მოხდა.
სხვა პრიზები კი ასე განაწილდა: საუკეთესო ახალგაზრდად ბარსელონელი პედრი გამოცხადდა, საუკეთესო ფორვარდად – ლევანდოვსკი. სეზონის მეკარე ჯანლუიჯი დონარუმა გახდა, ხოლო ქალ ფეხბურთელთაგან კიდევ ერთი ბარსელონელი, ალექსია პუტელიასი გამოარჩიეს.
და ისევე როგორც თითქმის უკვე სამი ათწლეულია, სიამაყით აღვნიშნავთ, რომ საქართველოდან ოქროს ბურთის გამოკითხვაში ხმა სარბიელის გამომცელელმა ზურაბ ფოცხვერიამ მისცა.
მისი ხუთეული ასეთი იყო: ლევანდოვსკი, რონალდუ, ბენზემა, მესი, ჟორჟინიო.
მეკარეები: დონარუმა, შმაიხელი და ნოიერი
