შემოდგომის ტესტების მოთავების შემდეგ საფრანგეთის მთავარ სარაგბო ლიგაში მე-11 ტური გაიმართა. ტოპ 14-ის მორიგი უიქ-ენდი 14 ქართველი მორაგბის მონაწილეობით წარიმართა და მართალია, ქულა არც ერთ მათგანს დაუგროვებია, მაგრამ სტატისტის როლით თითქმის არავინ შემოფარგლულა.
ლიდერი „ტულუზისა“ და „ბრივის“ მატჩი კი გამორჩეულად საინტერესო გამოდგა. სტუმართა სასტარტო შემადგენლობაში სოსო ბეკოშვილი იყო და უნდა აღინიშნოს, რომ მთელი პირველი ნახევრის მსვლელობისას სწორედ ბრიველთა შერკინება დომინირებდა.
მთლიანობაში კი თამაში საოცარი სცენარით განვითარდა – 62-ე წუთამდე მოკრძალებული „ბრივი“ საფრანგეთისა და ევროპის უძლიერეს საკლუბო გუნდს ამარცხებდა და რეფერი ლორან კარდონას სიმკაცრე რომ არა, ვინ იცის, ეგებ მიმდინარე რეგულარული სეზონის უმთავრესი სენსაციის მოწმენიც გავმხდარიყავით. მაგრამ მსაჯმა 61-ზე ჯერ სტუმართა მესამეხაზელი დასაჯა ყვითელი ბარათით, ხოლო 6 წუთში მგეზავი ენცო ერვე უკვე მატჩის ბოლომდე, წითელი ბარათის ძალით მიაბრძანა მინდვრიდან. 13 ბრიველი, ცხადია, გატყდა და ამ უთანასწორო ბრძოლის ბოლო 18 წუთში ტულუზელებმა 3 უპასუხო ჯარიმაც გაიტანეს. საბოლოოდ – 18:11 და „ბრივმა“, საარაკო თავდადების მიუხედავად, სანუგეშო ბონუსიც კი ვერ მიიღო.
შესვენების შემდეგ ბეკოშვილი ლუკა ჯაფარიძემ შეცვალა, 52-ე წუთზე თამაშში ვანო კარკაძე შევიდა, 71-ეზე – თედო აბჟანდაძე, ხოლო 74-ეზე – ოთარ გიორგაძე.
„ტულუზს“ 2 ქულით „ბორდო“ ჩამორჩება, რომელმაც პარიზში „რასინგ-92“ ბონუსით, 37:14 დაამარცხა. მასპინძელთა შორის ბოლო ნახევარი საათი გურამ გოგიჩაშვილმა ითამაშა, ხოლო ბორდოელთა რიგებში 65-ე წუთზე ლექსო ყაულაშვილი გამოჩნდა.
ლიდერთა სამეულში პირველად შევიდა „მონპელიე“ რომელმაც ლევან ჩილაჩავას „კასტრს“ უმძიმეს ბრძოლაში 25:24 მოუგო და ბონუსიც გაატანა. ჩილაჩავამ ბოლო 15 წუთი ითამაშა.
აუტსაიდერებმა თავთავიანთი მატჩები კი მოიგეს, მაგრამ მაინც ცხრილის ფსკერზე დარჩნენ.
„ბიარიცმა“ „სტად ფრანსეს“ უმასპინძლა და 17:14 დაამარცხა. ბასკთა სასტარტოში თორნიკე ჯალაღონია იყო, ვინც 56-ე წუთზე შეცვალეს, ხოლო ლუკა აზარიაშვილმა ბოლო ნახევარი საათი ითამაშა. პარიზელებს შორის პირველიდან 56-ე წუთამდე გიორგი მელიქიძე იყო.
„პერპინიანმა“ კი „კლერმონი“ მიიღო და 26:24 გაისტუმრა. ვეტერანი დუდუ ქუბრიაშვილი გაძევებული ბურჯის ნაცვლად თამაშში ჯერ 31-ეზე ათი წუთით ჩაერთო, შემდეგ კი 61-ეზე დაბრუნდა თამაშში.
„ლა როშელმა“ ბონუსით, 36:8 დაამარცხა „პო“ რომლის სასტარტოში ბექა გორგაძე იყო. ბორჯღალოსანი 8 ნომერი 56-ე წუთზე შეცვალეს.
კიდევ ერთი ბორჯღალოსანი, თანაც ბექა, „ტულონის“ სასტარტოშიც იყო – გიგაშვილმა 55-ე წუთამდე ითამაშა, ხოლო მისმა გუნდმა მრისხანე „ლიონს“ 19:13 სძლია.
