BBC-ს თანახმად, ზინედინ ზიდანს „მანჩესტერ იუნაიტედის“ მწვრთნელის თანამდებობა არ აინტერესებს. ბრიტანეთის საზოგადოებრივი მაუწყებელი ავრცელებს ცნობას, რომ ოლე გუნარ სულშერის თანამდებობიდან გაშვების შემდეგ ფრანგს „ოლდ ტრეფორდიდან“ დაურეკეს და პასუხად უარი მიიღეს.
მანჩესტერელებს იმედი ჰქონდათ, რომ „რეალის“ ყოფილი თავკაცი მათთან გადაბარგებას თავისი ყოფილი ფეხბურთელების, კრიშტიანუ რონალდუსა და რაფაელ ვარანის ხათრით მაინც დათანხმდებოდა — ფორვარდიცა და ცენტრალური მცველიც ზაფხულში „იუნაიტედის“ ფეხბურთელები გახდნენ.
როგორც კატალონიელი ჟურნალისტი, ლეო მესიზე, კრიშტიანუ რონალდუსა და სხვა ვარსკვლავებზე წიგნების ავტორი გილემ ბალაგე წერს, მართალია ზიდანი მანჩესტერში გადასვლას უარობს, მაგრამ ის თანახმაა მაურისიო პოჩეტინოს „ოლდ ტრეფორდზე“ გადასვლის შემთხვევაში „პარი სენ ჟერმენი“ ჩაიბაროს.
შეგახსენებთ, რომ აქამდე ზიდანს საფრანგეთის ნაკრების მომავალ მწვრთნელად მოიხსენიებდნენ — „ლურჯების“ ახლანდელ თავკაც დიდიე დეშამს საფრანგეთის ფეხბურთის ფედერაციასთან კონტრაქტის ვადა 2022 წლის მუნდიალის შემდეგ ეწურება.
49 წლის ზიდანმა „რეალის“ სათავეში ყოფნის ორი პერიოდის განმავლობაში სამჯერ მოიგო ჩემპიონთა ლიგა და ორჯერ გუნდი ესპანეთის ჩემპიონის ტიტულამდე მიიყვანა.
როგორც ამბობენ, „პარი სენ ჟერმენის“ მოქმედმა მწვრთნელმა მაურისიო პოჩეტინომ ოლე გუნერ სულშერის წასვლის შემდეგ „მანჩესტერ იუნაიტედის“ გაძღოლე მოიწადინა.
