„რეალმა“ ლა ლიგის მე-13 შეხვედრაში, გრანადაში 4:1 გაიმარჯვა და ცხრილის სათავეშია. მადრიდელთა იტალიელმა მწვრთნელმა კარლო ანჩელოტიმ მატჩის შემდგომ პრეს-კონფერენციაზე თავისი ფეხბურთელები შეაქო. მან განსაკუთრებით კაზემირო, ტონი კროოსი და ლუკა მოდრიჩი გამოყო. იხუმრა კიდეც, ეს სამეული 2031 წელსაც ასევე ითამაშებსო.
„აქ სალაპარაკოც არაფერია. ეს სამეული ძალიან მაღალ დონეზე თამაშობს. ჩემი აზრით, ასაკის მიუხედავად ისინი მსოფლიოს უძლიერესი ნახევარმცველები არიან. მათი თამაში მაოცებს. ისინი ბუნებრივად აკეთებენ ისეთ რაღაცებს, რაც მე არ დამივალებია, მაგრამ საჭიროა. ისინი წარსულშიც საუკეთესო ფეხბურთს თამაშობდნენ, დღესაც დიდებულად თამაშობენ და ალბათ მომავალშიც ასე გააგრძელებენ. თუმცა, მომავლისთვის ჩვენ ედუარდო კამავინგა, ფედე ვალვერდე და ანტონიო ბლანკოც გვყავს“.
„გრანადასთან“ სასტარტო შემადგენლობაში კვლავ ითამაშა მარკო ასენსიომ, რომელმაც ჩინებული შთაბეჭდილება მოახდინა და მე-19 წუთზე ანგარიში გახსნა.
ანჩელოტი: „აგერ უკვე მეორე შეხვედრაა, რაც ასენსიოს სასტარტო შემადგენლობაში ვათამაშებ. ის სრულყოფილად ასრულებს ჩემს დავალებებს. მარკო მაღალი ხარისხის ფეხბურთს გვაჩვენებს და ეს ყველაფერზე მნიშვნელოვანია“.
„რეალს“ უახლოეს მომავალში ბევრი თამაში უწევს. ჟურნალისტებმა მწვრთნელს ჰკითხეს, აპირებს თუ არა ის როტაციის პრინციპით მოქმედებას.
„გუნდი ფიზიკურად ჩინებულ ფორმაშია, მაგრამ ედერ მილიტაო ცოტა დაღლილი მეჩვენა. სამაგიეროდ, დღეს ძალიან მომეწონა ნაჩო. რაც შეეხება როტაციას, დიახ, შეიძლება ზოგი ფეხბურთელი შევცვალო, რადგან მე ვენდობი იმ ფეხბურთელებს, რომლებიც შედარებით იშვიათად თამაშობენ“.
ბოლო პერიოდში ნაქები ვინისიუს ჟუნიორი კი ანჩელოტიმ ის 71-ე წუთზე შეცვალა, თუმცა განმარტა კიდეც რატომ გააკეთა ეს:
„ვინი პრობლემებს ავარიდე. ბოლოსკენ ვნებათაღელვამ იმატა და გადავწყვიტე როგორც ჩვენი გუნდი, ასევე „გრანადა“ გართულებებისთვის ამერიდებინა“.
